Ubushakashatsi bwakozwe n’abo muri Kaminuza ya New South Wales bwagaragaje ko itabi rikozwe mu buryo bw’ikoranabuhanga (electronic cigarette), ridafasha abantu kureka kunywa itabi risanzwe, ahubwo ribatera kurwara kanseri ifata mu kanwa n’iy’ibihaha.

Electronic cigarette ni akuma k’ikoranabuhanga kohereza ibimeze nk’amazi mu kanwa biba bigizwe n’ibinyabutabire bitandukanye birimo nicotine, propylene glycol, glycerine. Uyikoresha akurura umwuka uba wavuyemo ibyo bita ‘Vaping’.

Nubwo impuguke mu buzima zikunze kuvuga ko e-Cigarette itagira ingaruka mbi ku buzima nk’itabi risanzwe, abashakashatsi bo muri Australia bagaragaje ko bamaze kubona ibimenyetso bifatika by’uko aka kuma k’ikoranabuhanga kagira ingaruka mbi ku buzima bw’umuntu.

Itsinda ry’abashakashatsi bo muri Kaminuza ya New South Wales iherereye mu murwa mukuru wa Australia, Sydney, bagaragaje ko ibyo babibonye binyuze mu bushakashatsi bwasohowe hagati ya 2017 na 2025 buvuga ku bibi by’itabi rya e-Cigarette.

Bimwe mu byo bagaragaje biteye inkeke kuri e-Cigarette ni uko kuyinywa bishobora guhindura utunyangingo tw’umuntu, ibishobora kumuviramo no kurwara indwara ya kanseri.

Bagaragaje ko kunywa itabi rya e-Cigarette ari bibi ku buzima bw’umuntu kuko bishobora kwangiza imyanya y’ubuhumekero bigatuma arwara indwara ya kanseri y’ibihaha ndetse na kanseri ifata mu kwana.

Aba bashakashatsi bagaragaje ko abantu bafite ibyago byo kurwara izi ndwara ari abanywa itabi risanzwe ndetse n’irya e-Cigarette, kubera ko iyo ubivanze bishobora gutuma urwara kanseri y’ibihaha mu buryo bworoshye.

Prof Bernard Stewart wari ukuriye ubu bushakashatsi yavuze ko itabi rya e-Cigarette atari bwo buryo bwo guhagarika kunywa irisanzwe kandi ko ridatekanye.

Ati “Ubushakashatsi bwerekana ko ‘Vaping’ atari bwo buryo bwo guhagarika kunywa itabi ry’imyotsi kandi ntabwo ritekanye rwose kuko ntabwo ari ryiza ku buzima bw’umuntu.”

Ishami ry’Umuryango w’Abibumbye ryita ku buzima, OMS, rigaragaza ko abarenga miliyoni 100 ku Isi bakoresha itabi rya e-Cigarette rwego rwo guhagarika kunywa irisanzwe.