Ferrari yasohoye amafoto agaragaza bike mu bice bigize imodoka yayo nshya itegerezanyijwe amatsiko menshi ikoresha amashanyarazi gusa, ihishura izina ryayo n’imiterere y’imbere hayo.

Iyi modoka yitwa Luce ni yo ya mbere yo mu cyiciro cy’iza ‘sports’ zikoresha amashanyarazi, ikozwe n’uru ruganda rwubatse izina rwo mu Butaliyani.

Luce bisobanuye urumuri mu rurimi rw’Igitaliyani. Amafoto yashyizwe hanze agaragaza intebe zayo zikoze mu ruhu, volant na écran umushoferi yifashisha mu kumenya amakuru y’ikinyabiziga.

Imiterere y’iyi modoka inyuma ntiyagaragajwe, Ferrari ikaba yatangaje ko izagirwa ibanga kugeza muri Gicurasi uyu mwaka.

Uruganda rwa Ferrari rwavuze ko mu kugena imiterere y’iyi modoka rwakoranye n’itsinda rya LoveFrom ryashinzwe n’abahanga mu kugena imiterere y’imodoka, Sir Jony Ive na Marc Newson.

Ikoranabuhanga ryifashishijwe mu gukora iyi modoka nshya, ryamuritswe na Ferrari mu Ukwakira umwaka ushize.

Uru ruganda rwavuze ko iyi modoka izaba ifite uburyo bwihariye bwo gutunganya no kongera amajwi aturuka muri moteri yayo, kugira ngo yumvikane nk’asanzwe amenyerewe ku modoka za Ferrari n’ubwo yo izaba ikoresha amashanyarazi gusa.