Freddy Kaniki Rukema usanzwe ari Visi Perezida w’ihuriro AFC rirwanya ubutegetsi bwa Repubulika Iharanira Demokarasi ya Congo ushinzwe ubukungu n’imari, yagizwe Perezida w’umutwe witwaje intwaro wa MRDP-Twirwaneho ukorera mu Ntara ya Kivu y’Amajyepfo.

Umuvugizi wa Twirwaneho, Kamasa Ndakize Welcome, ku wa 1 Nyakanga 2025 yasobanuye ko iki cyemezo cyafashwe n’abanyamuryango b’uyu mutwe ku wa 18 Mata, gishyigikirwa n’akanama k’inararibonye.

Brig Gen Charles Sematama yagizwe Visi Perezida wa mbere wa Twirwaneho ushinzwe ibikorwa bya gisirikare n’umutekano n’Umugaba Mukuru w’abarwanyi b’uyu mutwe witwaje intwaro.

Alexis Mugisha yagizwe Visi Perezida wa kabiri wa Twirwaneho ushinzwe imiyoborere, politiki na dipolomasi, Adele Kibasumba agirwa Umunyamabanga Mukuru.

MRDP-Twirwaneho yinjiye muri AFC nyuma y’urupfu rwa Brig Gen Michel Rukunda alias Makanika wari umuyobozi wayo. Uyu musirikare yishwe muri Gashyantare 2025.