Ku wa 1 Kanama 2025, Perezida William Ruto wa Kenya akaba n’Umuyobozi Mukuru w’umuryango wa Afurika y’iburasirazuba (EAC) na Emmerson Mnangagwa uyobora Zimbabwe n’umuryango wa Afurika y’amajyepfo (SADC) bayoboye inama yiga ku buryo amahoro yaboneka mu burasirazuba bwa Repubulika Iharanira Demokarasi ya Congo.

Iyi nama yabereye i Nairobi muri Kenya yitabiriwe n’abahuza bashyizweho n’iyi miryango yombi ari bo Olusegun Obasanjo, Uhuru Kenyatta, Catherine Samba Panza, Sahle-Work Zewde, n’abandi barimo Mahamoud Ali Youssouf uyobora Komisiyo y’umuryango wa Afurika Yunze Ubumwe (AU), Minisitiri Olivier Nduhungirehe w’u Rwanda n’abandi.

Hafashwe umwanzuro w’uko inteko y’abahuza batanu bashyizweho na EAC-SADC yinjiramo umuhuza wa Afurika Yunze Ubumwe (AU), Faure Essozimna Gnassingbé, bikazamenyeshwa AU n’abakuru b’ibihugu bazahurira mu nama idasanzwe izifashisha ikoranabuhanga ry’iyakure mu minsi irindwi iri imbere.

Perezida Ruto, Mnangagwa n’abandi bitabiriye iyi nama basabye ko ubunyamabanga tekiniki bwa Komisiyo ya AU, ubwa EAC n’ubwa SADC buhuzwa, bukaba ‘Ubunyamabanga buhuriweho’ buzayoborerwa na Komisiyo ya AU i Addis Abeba muri Ethiopia.

Basabye ko inyandiko zigenga imikorere y’umuhuza wa AU n’abashyizweho na EAC-SADC zahuzwa, bikazemezwa n’inama y’abakuru b’ibihugu iteganyijwe mu cyumweru gitaha, hifashishijwe ikoranabuhanga.

Abitabiriye iyi nama bagaragaje ko kugira ngo u Burasirazuba bwa RDC bufashwe kugera ku mahoro n’umutekano, hakwiye gushakwa ubushobozi burimo ubwo mu rwego rw’ubutabazi, iyi gahunda ikazayoborwa na Komisiyo ya AU.

Iyi myanzuro ifashwe mu gihe Leta Zunze Ubumwe za Amerika na Qatar bikomeje gushyira imbaraga mu kugarura amahoro n’umutekano mu burasirazuba bwa RDC ndetse no mu karere muri rusange.

Amerika yafashije u Rwanda na RDC kugirana amasezerano y’amahoro tariki ya 27 Kamena 2025, tariki ya 19 Nyakanga 2025 Qatar na yo ifasha Leta ya RDC n’ihuriro AFC/M23 kumvikana ku mahame ngenderwaho aganisha ku masezerano y’amahoro.

Amerika na Qatar byagaragaje ko gahunda zabyo zubakiye ku byagezweho n’imiryango yo muri Afurika, ari yo EAC, SADC ndetse na AU.