Umugaba Mukuru w’Ingabo za Uganda, Gen Muhoozi Kainerugaba, yagarutse ku rubuga rwa X rwahoze rwitwa Twitter yari amaze iminsi mike atangaje ko ahagaritse gukoresha.

Sponsored Ad

Ku wa Kane tariki ya 16 Mutarama ni bwo uyu musirikare yanditse kuri ruriya rubuga ati: “Ndagarutse!”

Gen Muhoozi wavuze agarutse “gutigisa Isi”, ubutumwa bw’uko yagarutse kuri X bwakurikiwe n’uruhererekane rw’ubundi bwinshi, burimo ubuha inzego z’umutekano za Uganda guta muri yombi abarwanashyaka b’ishyaka National Unity Platform (NUP) rya Bobi Wine bazajya bagaragara bafite ibikoresho bimeze nk’ibya gisirikare.

Ati: “Kuva uyu munsi mpaye inzego zose z’umutekano uruhushya rwo guhita zita muri yombi umu-NUP uwo ari we wese, cyangwa undi muntu wo muri Opozisiyo wambara ikintu cyose gisa n’impuzankano ya gisirikare. Hanyuma abatazubahiriza iri tegeko…bafite ibibazo byabo.”

Uyu musirikare usanzwe ari umuhungu wa Perezida Yoweri Kaguta Museveni, mu bundi butumwa yavuze ko yagaruwe kuri X no “gutabara abagore nk’uko bisanzwe.”

Yakomeje agira ati: “Numvise ko abagore bashakaga kwiyahura. Ndashaka kumenyesha Isi ko twebwe…abirabura ari twe tugenzura Isi.”

Gen Muhoozi yanagaragaye yibasira umwe mu badipolomate ba Leta Zunze Ubumwe za Amerika atavuze izina, avuga ko “ningira aho musanga ntahaguruke ngo anterere isaluti, nzahita muta muri yombi.”

Muhoozi mu bundi butumwa yanakomoje kuri Col. Dr. Kizza Besigye ubutabera bwa gisirikare bufunze bumukurikiranyeho ibyaha birimo ubugambanyi no gushaka guhirika ubutegetsi bwa Perezida Yoweri Kaguta Museveni, avuga ko ku munsi w’intwari agomba kumanikwa.

Ati: “Ku munsi w’intwari tuzamanika KB [Kizza Besigye]. Uwo ni wo munsi mwiza we kurusha indi wo gupfiraho. Nyuma y’aho tuzata muri yombi umuntu wese wo muri Guverinoma uvuga nabi Afande Saleh [Salim].”

Muhoozi asa n’ubyina ku mubyimba Besigye, yavuze ko uyu munyapolitiki utavuga rumwe n’ubutegetsi bwa Uganda yakundaga kumwita “ikigoryi n’ikigwari”, ashimangira ko “igiti cy’abagambanyi kiramutegereje muri Gulu.”

Ku itariki ya 10 Mutarama ni bwo Muhoozi yari yasezeye ku rubuga rwa X amaze imyaka irenga 10 akoresha.

Icyo gihe yavugaga ko Yesu yamusabye kwita ku ngabo za Uganda abereye Umugaba Mukuru, gusa avuga ko nasoza ubutumwa bwe azongera gukoresha ruriya rubuga.