Ikigo gitanga serivisi za internet mu bice binyuranye bya Afurika, Paratus Group, cyatangaje ko cyatangije umuyoboro wa internet yihuta [fibre optique] uva mu mujyi wa Mombasa ukagera i Goma, Uganda no mu Rwanda.

Paratus yatangaje ko insinga za ‘fibre optique’ zireshya na kilometero 2000 ziva ku Cyambu cya Mombasa zikagera i Goma mu Burasirazuba bwa Repubulika Ikaranira Demokarasi ya Congo. Hazaba harimo ububiko bw’amakuru [data centers] mu mijyi nka Kigali, Kampala na Nairobi.

Iki kigo kivuga ko bifasha imijyi izanyuramo kubona internet ifite imbaraga yaba ku bigo bisanzwe bitanga serivisi za internet no ku bakiliya basanzwe bafite ibigo byabo ahantu hanyuranye.

Umuyobozi Mukuru ushinzwe Ubucuruzi muri Paratus Group, Martin Cox, yavuze ko iyi internet izafasha kuzamura urwego rw’ubukungu bushingiye ku ikoranabuhanga muri Afurika y’Iburasirazuba.

Ati “Gushyiraho umuyoboro utekanye kuva ku cyambu kugera i Goma, ni uguha amahirwe ibigo bitanga internet n’ibigo by’ubucuruzi yo kubasha kugera ku ruhando mpuzamahanga. Birazamura ubudahungabana n’imikorere myiza kandi bigafungura andi mahirwe y’ubucuruzi muri Kenya, Uganda, mu Rwanda no muri RDC.”

Yashimangiye ko bifasha Paratus Group guhamya ibirindiro muri EAC, bikanuzuzanya n’undi muyoboro wa fibre optique ihuza u Burasirazuba bwa Afurika n’u Burengerazuba, uva i Maputo ukagera Swakopmund muri Namibia.

Paratus Group ikorera mu bihugu byose bya EAC binyuze mu bigo byayo bihanditse nka Paratus Rwanda, Paratus Kenya, Paratus Uganda, ndetse igira imikoranire n’ibigo by’ikoranabuhanga mu itumanaho n’isakazabumenyi nka Roke Telecom Uganda na MoveOn Telecoms yo muri Kenya.

Uretse internet yakwirakwije mu bice bitandukanye binyuze muri ‘fibre optique’, inatanga internet ikoreshwa na satellites.