Minisitiri w’Ubutabera wa Hongrie, Bence Tuzson yatangaje ko bari gukuerikirana umunyamakuru witwa Szabolcs Panyi uri mu batavuga rumwe n’ubutegetsi, wemeye ko yakoranye n’inzego z’ubutasi z’amahanga mu gutata igihugu cye.

Ni amakuru yamenyekanye ku wa 26 Werurwe 2026, atangajwe na minisitiri mu Biro bya Minisitiri w’Intebe muri Hongrie, Gergely Gulyas.

Gergely Gulyas yabwiye abanyamakuru ati “Muri Hongrie, amakuru uyu munsi agamije ubutasi. Uwa mbere muri ibi ni Szabolcs Panyi, byamenyekanye ko yahoze atata igihugu cye mu bufatanye n’igihugu cy’amahanga.”

Panyi afite igitangazamakuru cyo muri Hongrie kizwi nka, Vsquare giterwa inkunga n’ibigo byo muri Amerika n’u Burayi.

Mu cyumweru gishize mu majwi yagiye hanze, Panyi yumvikanye avuga ko yahaye nimero ya Minisitiri w’Ububanyi n’Amahanga wa Hongrie, Péter Szijjártó, urwego rwa kimwe mu bihugu byo mu Burayi.

Abo mu nzego z’ibanga z’icyo gihugu bakuruye amakuru menshi arimo ajyanye n’abo iyo nimero ihamagara, abayihamagara n’andi makuru y’ingenzi.

Hifashishijwe ayo makuru, uru rwego rutavuzwe mu mazina rwashyize hanze ikiganiro Minisitiri Szijjarto, yagiranye na mugenzi we w’u Burusiya, Sergey Lavrov, runagiha ibinyamakuru birimo nka Washington Post na Politico.

Nyuma Panyi na Peter Magyar utavuga rumwe n’ubutegetsi bwa Hongrie bifashishije izo nkuru zakozwe mu kugaragaza ko Minisitiri Szijjarto na Lavrov bari gukorana mu buryo bw’ibanga.

Minisitiri Szijjarto yavuze ko nk’umwe mu baminisitiri ba EU bamaze igihe kirekire muri izi nshingano z’ububanyi n’amahanga, akunda kuvugana na Lavrov amushyiriye ubutumwa bagenzi be baba bamugeneye.

Byashimangiwe kandi na Gulyas wavuze ko “kugira uruhare mu guteza imbere umubano w’ibihugu byombi ari dipolomasi mu gihe bitanyuranyije n’inyungu za Hongrie.”

Minisitiri w’Ubutabera wa Hongrie, Bence Tuzson yatangaje ko ubu ikirego kiri mu nzego z’ubugenzacyaha, agaragaza ko ubutasi nk’ubukekwa ko bwakozwe na Panyi ari icyaha gikomeye ugihamijwe ahanishwa igifungo kirekire.