Kuri uyu wa kabiri tariki ya 02 Kamena 2026, nyuma ya saa sita, Perezida w’u Bufaransa Emmanuel Macron na mugenzi we w’u Rwanda Paul Kagame bazafungura urwibutso rwa Jenoside i Paris, rwubatswe mu rwego rwo guha icyubahiro abazize jenoside yakorewe Abatutsi mu 1994 mu Rwanda, nk’uko byatangajwe na Perezidansi y’u Bufaransa.

Uru rwibutso rwiswe “L’Archive”, rwubatswe ku nkombe z’umugezi wa Seine ku bufatanye bwa Leta y’u Bufaransa n’umujyi wa Paris. Rwakozwe n’umuhanzi Grada Kilomba nk’ahantu ho kwibukira no gusabira abishwe, ndetse no kwimakaza ihererekanyabumenyi ku mateka ya jenoside yakorewe Abatutsi mu Rwanda, nk’uko byavuzwe na Perezidansi y’u Bufaransa.

Mu muhango wo gufungura uru rwibutso, biteganyijwe ko Perezida Macron na Perezida Kagame bazageza ijambo ku bitabiriye uwo muhango, mu gihe abandi bazagira uruhare barimo Meya w’Umujyi wa Paris Emmanuel Grégoire, ndetse na Jeanne Uwimbabazi, umwe mu barokotse Jenoside yakorewe Abatutsi uzatanga ubuhamya.

Umuhanzi n’umwanditsi Gaël Faye azavuga umuvugo wanditswe n’umwanditsi w’Umunyarwanda, Beata Umubyeyi Mairesse, na we warokotse jenoside.

Perezidansi y’u Bufaransa ivuga ko uyu muhango ugaragaza gukomeza inzira yo kwiyunga no gusobanura amateka hagati y’u Bufaransa n’u Rwanda. Iyi nzira ishingiye ku biganiro bihuriweho, ubushakashatsi ku kuri kw’amateka, ndetse no kwemera uruhare rw’u Bufaransa ku byabaye mu gihe cya Jenoside.

Mu 2021, Perezida Macron yari yasuye u Rwanda i Kigali, aho yemeye ko igihugu cye gifite “uruhare rukomeye rw’amateka” mu byabaye muri Jenoside yakorewe Abatutsi, yahitanye abarenga miliyoni hagati ya Mata na Nyakanga 1994.

Nubwo uyu mubano w’ibihugu byombi wagiye utera imbere mu myaka yashize, haracyari ibibazo by’umutekano mu karere, cyane cyane mu burasirazuba bwa Repubulika Iharanira Demokarasi ya Congo, bikomeje kugira ingaruka ku mubano w’ibihugu byombi.

Ifungurwa ry’uru rwibutso rizakurikirwa n’indi mihango y’inama n’ifunguro rya nimugoroba ku rwego rw’igihugu, igamije gukomeza gushimangira umubano hagati ya Paris na Kigali.