Ikigo cy’Igihugu Gishinzwe Ibarurishamibare (NISR) cyagaragaje ko ibiciro byo ku masoko yo mu mijyi mu Rwanda byazamutseho 6,5% muri Werurwe 2025, ugereranyije n’ukwezi nk’uku mu mwaka ushize.

Sponsored Ad

Raporo ya NISR igaragaza ko izamuka ry’ibi biciro ryatewe ahanini n’ibiciro by’ibiribwa n’ibinyobwa bidasembuye byiyongereyeho 6,4%, ibiciro by’ibijyanye n’ubwikorezi byiyongereyeho 12% ndetse n’ibiciro by’amafunguro n’icumbi byiyongereyeho 14,1%.

Bigaragara ko ugereranyije na Werurwe 2024, ibiciro by’ibintu bitarimo ibiribwa n’ibikomoka ku ngufu muri Werurwe 2025 byiyongereyeho 5,8%.

Ugereranyije na Gashyantare 2025, ibiciro muri Werurwe 2025 byiyongereyeho 1,3% bitewe ahanini n’ibiciro by’ibiribwa n’ibinyobwa bidasembuye byiyongereyeho 2,4%. Aha ni ku biciro byo mu mijyi ari nabyo bigenderwaho cyane.

Mu byaro, ibiciro byiyongereyeho 3,9% muri Werurwe 2025, ugereranyije na Werurwe 2024, bitewe ahanini n’izamuka ry’ibiciro by’ibiribwa n’ibinyobwa bidasembuye ryageze kuri 2,3% n’iry’ibiciro by’ibinyobwa bidasembuye n’itabi ryageze kuri 6,5%.

Ugereranyije na Gashyantare 2025, ibiciro muri Werurwe 2025 byiyongereyeho 2,2% nk’uko raporo ya NISR ikomeza ibigaragaza. Byatewe n’ibiciro by’ibiribwa n’ibinyobwa bidasembuye byiyongereyeho 3,2%.

Muri rusange, ibiciro mu Rwanda hose byiyongereho 4,9% muri Werurwe 2025, ugereranyije n’ukwezi nk’uku mu mwaka ushize. Muri Gashyantare 2025, byari byiyongereyeho 3,8%.

Izamuka ry’ibiciro muri rusange ryatewe n’ibiciro by’ibiribwa n’ibinyobwa bidasembuye byiyongereyeho 3,5%, ibiciro by’ibijyanye n’ubwikorezi byiyongereyeho 11,8% n’ibiciro by’amafunguro n’icumbi byiyongereyeho 10,8%.

Ugereranyije na Gashyantare 2025, ibiciro byiyongereyeho 1,9% muri Werurwe 2025, bitewe ahanini n’ibiciro by’ibiribwa n’ibinyobwa bidasembuye byiyongereyeho 3%.