Ibicuruzwa binyuranye bikorerwa mu Rwanda birimo ikawa, icyayi, urusenda, ubuki n’ibindi, biri mu bizamurikirwa mu imurikagurisha ryo mu Bushinwa rigamije guteza imbere ibyoherezwa n’ibitumizwa mu mahanga [Canton Fair], bikazamurikirwa abaguzi b’Abashinwa n’abandi baturutse hirya no hino ku Isi.

Iri ni imurikagurisha rimaze igihe kirekire mu Bushinwa, rikaba na rimwe riri mpuzamahanga.

Rikora nk’urubuga rw’ingenzi ruhuza inganda zikora ibintu mu Bushinwa, abacuruzi n’abafatanyabikorwa mu by’ubucuruzi baturutse impande zose ku Isi.

Iri murikagurisha ritegurwa n’Ikigo cy’u Bushinwa gishinzwe ubucuruzi mpuzamahanga [China Foreign Trade Centre], ku bufatanye na Minisiteri y’Ubucuruzi y’u Bushinwa ndetse n’ubuyobozi bw’intara ya Guangdong.

Mu myaka myinshi ishize riba, ryagize uruhare runini mu guteza imbere ubucuruzi, ishoramari, ndetse n’ubutwererane mu by’ubukungu, riba n’ikiraro gihuza inganda z’Abashinwa n’amasoko mpuzamahanga.

Muri uyu mwaka imurikagurisha rya Canton Fair rigiye kuba ku nshuro yaryo ya 139, rikazabera mu Mujyi wa Guangzhou kuva ku itariki ya 15 Mata kugeza ku ya 5 Gicurasi 2026.

Ambasaderi w’u Rwanda mu Bushinwa, James Kimonyo, yagize ati “Iri murikagurisha ntirigaragaza gusa ikoranabuhanga rigezweho ry’Abashinwa, imashini, n’ibicuruzwa bishobora gufasha mu kwihutisha iterambere ry’inganda mu Rwanda, ahubwo rinakora nk’urubuga rukomeye rwo gukurura abashoramari b’Abashinwa mu Rwanda”.

“Ni n’uburyo bwiza bwo kwerekana ibyo u Rwanda rukora ku bigo by’ubucuruzi by’Abashinwa, cyane cyane ibikora mu rwego rw’ubuhinzi.”

Ambasaderi Kimonyo yashishikarije abacuruzi b’Abanyarwanda kwitabira iri murikagurisha, avuga ko ari urubuga rwiza cyane rwo guhura no gukorana n’abafatanyabikorwa b’Abashinwa bizewe.

Umuyobozi w’Ihuriro ry’Abanyarwanda baba mu Mujyi wa Guangzhou, Ngiruwonsanga Leon, yavuze ko Abanyarwanda baba i Guangzhou biteguye gushyigikira abazitabira iri murikagurisha.

Ati “Twabikanguriye abanyamuryango bacu, kandi biteguye gushyigikira abacuruzi b’Abanyarwanda bazaba bazanywe no gushaka ibicuruzwa by’Abashinwa cyangwa kumurika ibicuruzwa byabo bwite.”

Mu myaka ya vuba, u Rwanda rwitabiriye ibikorwa binyuranye by’ubucuruzi n’ishoramari mu Bushinwa, birimo Imurikagurisha Mpuzamahanga ry’Ibitumizwa mu Bushinwa [China International Import Expo], n’Imurikagurisha ry’Ubukungu hagati y’u Bushinwa na Afurika [China-Africa Economic and Trade Expo].

Byagize uruhare mu bwiyongere bw’ibyo u Rwanda rwohereza mu Bushinwa n’izamuka ry’ishoramari ry’Abashinwa mu Rwanda, aho kuri ubu iki gihugu kiza mu myanya ya mbere mu bihugu bifite ishoramari ryinshi rituruka hanze mu Rwanda.