Ishami rya Mercedes-AMG rizwi nka Petronas F1 risanzwe rikora imodoka za Formula 1, ryakoze igare ridasanzwe rikoresha amashanyarazi, riboneka mu byiciro bitatu bya City Edition 750, Track Edition 750 na Rallye Edition 750.

Iri shami ryifuje gukora igare rifite ikoranabuhanga rigezweho, ku buryo umuntu arisanisha n’imodoka.

Yose afite moteri iba hagati na hagati ku igare [hejuru ya pedal] ifite ubushobozi bwo gutanga ingufu za watt 750, ukaba ushobora kuyatwara mu buryo bune butanga ingufu zitandukanye bitewe n’imiterere y’umuhanda uyatwariramo.

Afite uburyo ashobora kwitwara bidasabye kunyonga ariko akagendera ku muvuduko wa kilometero 32 ku isaha. Iyo ukoresheje ubwo buryo unyonga, ashobora kugendera ku muvuduko wa kilometero 45 mu isaha.

Aya magare yose afite amahembe arambuye afite uburebure bwa sentimetero 14 ariho ecran ifite pouse 5,5 ifasha mu kugaragaza amakuru y’urugendo, akagira n’amatara ya LED ashobora guhuzwa na casque yihariye yayagenewe nayo akorwa na Mercedes.

Bivuze ko ushobora gucana nk’itara riranga amerekezo, bikanagaragara kuri casque wambaye. Iyi casque ishobora no gukorana na feri y’igare ikaka buri uko uyifashe.

Iyi casque ihuzwa n’igare ku buryo ishobora no gukorana n’amatara ya feri n’andi y’igare
Amagare yose aboneka ku rubuga rwa Mercedes cyangwa ahacururizwa ibikoresho byayo, akaboneka mu byiciro bitatu bitandukanye hashingiwe ku ngano yayo [irito, iriringaniye cyangwa irinini].

Modeli ya ‘City Edition 750’ ni ryo gare ryoroheje mu yandi byasohokeye rimwe, rikaba rigura 4.000$. Rifite ibiro 26, rikaba ryaragenewe kugenda mu mihanda yo mu mijyi.

Ikadiri yaryo ikoze mu cyuma cya aluminium [6061 aluminum alloy frame and fork] rikagira ibara ry’umuringa rikunze gukoreshwa na Mercedes-AMG Petronas.

Iri gare rishobora guhindurirwa vitesse inshuro icyenda zitandukanye [Shimano Cues 9-speed], rikagira feri zikora neza cyane ku rwego rw’iza moto [Tektro two-piston hydraulic brakes], rikagira amapine afite umurambararo wa santimetero 70 n’ubugari bwa santimetero 5,6.

Iri gare riza rifite batiri imwe ishyirwa ku ikadiri [cya gice kiva ku mahembe kikagera hasi kuri pedal]. Iyo batiri yonyine ishobora gutanga ingufu zihagije zo kugenda intera ndende.

Hari andi mahitamo yo kugura indi batiri ishyirwa ku gice gihuza intebe n’ikiba gifasheho pedal [seat tube].

Iyo hongereweho batiri ya kabiri kubera ikoranabuhanga rifite rituma batiri zombi zikorana ‘dual battery system’, bituma rigenda intera ndende ishobora kugera ku bilometero 115 udakeneye kuryongerera umuriro.

Moteri ya kabiri igura 700$.

Bimwe mu bikoresho ugurana n’iri gare harimo garde-boue y’imbere igura 45$, iy’inyuma n’intebe y’inyuma bya 60$, umwanya wagenewe gushyiramo icupa ukaboneka kuri 29,99$.

Modeli ya ‘City Edition 750’ ni ryo gare ryoroheje mu yandi byasohokeye rimwe, rikaba rigura 4.000$

Ikadiri yaryo ikoze mu cyuma cya aluminium [6061 aluminum alloy frame and fork]

Iri gare rishobora guhindurirwa vitesse inshuro icyenda zitandukanye
Modeli ya kabiri yiswe ‘Track Edition 750’ ni igare rigura 5.500$ rifite ibilo 29.

Iri gare rifite ubushobozi bwisumbuyeho riboneka mu ibara ry’umukara. Ikadiri yaryo na yo ikoze muri aluminium.

Rifite amapine ya Pirelli Angel Urban GT afite umurambararo wa sentimetero 70 n’ubugari bwa sentimetero 5,72. Afasha utwaye igare kunyonga ku muvuduko wo hejuru no gukata amakorosi nta nkomyi.

Iri gare rifite feri za ‘Tektro four-piston hydraulic calipers’ na zo zikora nk’iza moto. Rifite vitesse zishobora guhindurwa inshuro icyenda zitandukanye [Shimano Cues 9-speed].

Riza rifite bateri imwe ariko n’amahitamo yo kugura indi kuruhande zigakoreshwa ari ebyiri. Na ryo rifite casque imeze nk’iy’irya ‘City Edition 750’ ihuzwa n’amatara y’igare.

Ibindi bice biguranwa na ryo bimeze nk’ibya ‘City Edition 750’.

Aya magare agira ecran ifite pouse 5,5 zifasha mu kugaragaza amakuru y’urugendo

Track Edition 750’ ni igare rigura 5.500$ rifite ibilo 29

Modeli ya gatatu ni igare rifite ubushobozi bwisumbuye ‘Rallye Edition 750’ rigura 7.500$, rikagira ibiro 31. Rifite boîte de vitesse ya Pinion C1.9, ikaba ifasha guhinduranya vitesse mu masegonda 0,2 gusa.

Amapine yaryo afite umurambararo wa sentimetero 70 n’ubugari bwa sentimetero 6,6. Feri zaryo ni iza ‘Tektro four-piston high-performance hydraulics’. Ibindi bice bihura n’iby’ayandi magare.

Amapine yaryo y’imbere afite ‘suspension forks’ wagereranya nka amortisseur zoroshya ingendo mu mikuku, kutabangamirwa na za dos d’âne mu gihe utwaye agendera ku muvuduko wo hejuru, n’ibindi.

Byumwihariko iri gare ryagenewe imihanda yangiritse cyane cyangwa iy’imisozi.

Amapine yaryo y’imbere afite ‘suspension forks’ wagereranya nka amortisseur zoroshya ingendo mu mikuku