Ibinyamakuru bikomeye mu karere birimo New Vision, NTV na The East African byasabwe n’Urwego rushinzwe ubutasi mu Gisirikare cya Uganda, CMI n’Umutwe wa RNC gutangaza inkuru zivuga neza umunyemari Rujugiro Tribert uvugwaho gutera inkunga RNC.

Sponsored Ad

Nkuko ikinyamakuru Virunga Post kibitangaza,Abanyamakuru b’ibi binyamakuru bikomeye mu karere batumiwe kujya gutara inkuru ku ruganda rw’itabi rwa Rujugiro ahitwa Arua kuva kuwa 26 kugeza kuwa 29 Werurwe 2019.

Amakuru yatangajwe n’iki kinyamakuru n’uko ngo intego y’uru rugendo kwari ugusiga isura nziza uru ruganda rwa Rujugiro ndetse bakavuga ko ari umugabo utikubira umaze guhindura ubuzima bw’abaturage bo muri ako gace by’umwihariko abahinzi b’itabi.

Aba banyamakuru bavuze ko uru ruganda rwitwa Meridien Tobacco Company rwa Rujugiro rwahinduye ubuzima bw’abanya Uganda, rubakura mu bukene ndetse ngo rwagize uruhare mu izamuka ry’ubukungu bwa Uganda.

Nubwo bivugwa ko uru ruganda ari urwa Rujugiro,umuvandimwe wa Perezida Museveni, Salim Saleh nawe afitemo imigabane myinshi.

Aba banyamakuru bajyanwe gutara inkuru mu gace ka Arua,basabwe gushaka ubuhamya bw’abahinzi ku byerekeye uko bari babayeho mbere y’uko uru ruganda rushingwa muri aka gace ndetse n’uko bateye imbere bitewe narwo.

Ushinzwe kwamamaza Rujugiro ndetse akaba n’umunyamuryango wa RNC, David Himbara aherutse kugaragara kuri NTV avuga imyato Rujugiro.

Ubuyobozi bwa Uganda bwahisemo kugaragaza neza Rujugiro Tribert mu binyamkuru bikomeye nyuma y’aho u Rwanda rumushinje gutera inkunga umutwe wa RNC ushaka guhungabanya umutekano w’Abanyarwanda.