Ku wa Kane, ibirindiro by’igisirikare cyo mu kirere cya NATO mu burengerazuba bw’u Budage byatangaje ko byazamuye umutekano wabyo ku rwego rwa kabiri rwo hejuru bitewe n’amakuru y’ubutasi avuga ko hashobora kugabwa igitero cy’iterabwoba.

Sponsored Ad

Ikigo cyavuze ku rubuga nkoranyambaga X kiti: "Abakozi bose b’ingenzi badakenewe cyane boherejwe mu rugo mu rwego rwo kwirinda". "Umutekano w’abakozi bacu ni cyo dushyira imbere. Ibikorwa birakomeza nk’uko byari byateganijwe."

Umuvugizi w’ibirindiro bya Geilenkirchen mu Budage yavuze ko umutekano wazamutse ku rwego rwa Charlie. Nkuko bisobanurwa na NATO, urwego Charlie bivuze ko habaye cyangwa ko hari ibimenyetso byerekana ko bishoboka cyane ko igikorwa cy’iterabwoba cyibasira umuryango.

Abayobozi nta bisobanuro birambuye batanze ariko bemeza ko nta mpamvu yo guhangayika kandi ko umutekano wakajijwe mu rwego rwo kwirinda nk’uko iyi nkuru dukesha Deutsche Welle ikomeza ivuga.

Ni ku nshuro ya kabiri umutekano wongerewe muri ibi birindiro bya NATO by’indege za AWACS zikora ubutasi.

Mu cyumweru gishize, ibi birindiro bya gisirikare biherereye i Cologne byarafunzwe kugira ngo bikore iperereza ku bakekwaho kugeragiza kwangiza amazi nyuma y’umwobo wabonetse mu ruzitiro hafi y’ububiko bw’amazi yo kunywa.

NATO yaburiwe mbere iterabwoba ry’u Burusiya rishobora kuba rikubiyemo ibikorwa byo guhungabanya umutekano ndetse no kugaba ibitero by’ikoranabuhanga.