Ibitaro bya Güven Hospital byo muri Turikiya byafunguye ibiro byo gufashirizamo abashaka kujya kubyivurizamo mu rwego rwo kuborohereza kujyayo.

Ni ibiro byafunguwe ku mugaragaro ku itariki 27 Gashyantare 2026.

Umuhango wo gutangiza ibyo biro witabiriwe na Ambasaderi wa Turikiya mu Rwanda, Aslan Alper Yüksel, abahagarariye Minisiteri y’Ubuzima n’abaturutse mu Bitaro bya Gisirikare by’u Rwanda.

Abahagarariye ibigo by’ubwishingizi, abaganga baturutse muri Güven Hospital, abaganga bo mu Rwanda ndetse n’abarwayi b’Abanyarwanda bamaze kwivuriza muri ibi bitaro bagakira.

Ibyo i Kigali biyobowe na Patrick Oli Uwimbabazi Karangwa na Kamanda David bazajya bakurikirana ibikorwa byabyo.

Ibi biro bizajya bikora nk’ahantu hatangirwa amakuru n’ubujyanama ndetse no guhuza ibikorwa ku barwayi bashaka kujya kwivuriza mu Bitaro bya Güven Hospital biherereye mu Mujyi wa Ankara muri Turikiya.

Bizajya bifasha mu kohereza abarwayi muri ibyo bitaro, gutanga ubujyanama ku by’ingendo no gukurikirana abarwayi bajya kwivurizayo by’umwihariko ku buvuzi bw’indwara bwihariye.

Ibitaro bya Güven Hospital byashinzwe mu 1975, biherereye mu Mujyi wa Ankara, Umurwa Mukuru wa Turikiya.

Bibarizwa mu bitaro byigenga bikomeye muri icyo gihugu kandi bizwi ku rwego mpuzamahanga kubera umwihariko wabyo mu isuzuma no kuvura indwara za kanseri harimo no kuzibaga, kuvura indwara z’umutima harimo no kuwubaga.

Bavura kandi indwara zifata imiyoboro y’amaraso, imvune z’amagufwa, gusimbuza ingingo z’umubiri, gufasha abagore gutera intanga, kubaga ubwonko n’izindi ndwara zisaba ubuvuzi bwihariye.

Bijyanye n’uburambe bw’imyaka myinshi, amahugurwa ahabwa abaganga babyo ku rwego mpuzamahanga n’ibikoresho bigezweho, ibi bitaro byiyemeje gutanga serivisi z’ubuvuzi zinoze, zigezweho kandi zishingiye ku kwita ku murwayi.

Itangizwa ry’ibi biro i Kigali rifatwa nk’intambwe ikomeye mu gushimangira ubufatanye mu by’ubuvuzi hagati y’u Rwanda na Turikiya ndetse no kwagura amahirwe ku Banyarwanda yo kubona ubuvuzi mpuzamahanga bwizewe.