Urwego rw’Igihugu rw’Iterambere (RDB) rwasinyanye amasezerano y’imikoranire n’Ikigo cy’Abashinwa cya Wuhan Yangluo Port Service Co. Ltd azakiganisha ku gushora imari mu mishinga y’ubwubatsi mu Rwanda, ubucukuzi bw’amabuye y’agaciro no mu gutunganya ibikomoka mu nganda.

Sponsored Ad

Aya masezerano yashyiriweho umukono mu Mujyi wa Changsha ahabereye Imurikagurisha ry’Ubukungu rihuza u Bushinwa na Afurika, China-Africa Economic and Trade Expo.

Wuhan Yangluo Port Services Co., Ltd, ni ikigo cyashinzwe muri Werurwe 2009 mu Karere ka Xinzhou mu Ntara ya Wuhan, kikaba gikorera ku cyambu gishya cya Wuhan.

Ibikorwa byacyo by’ingenzi birimo gutwara imizigo gitanga serivisi zo gupakira no gupakurura, gutanga ububiko, ubwikorezi, gutanga serivisi z’amakuru, ubwikorezi rusange bw’imizigo, ishoramari mu kubaka imishinga y’ibikorwa remezo by’ubwikorezi, gutanga serivisi z’imitungo, ubwubatsi, urwego rw’imari, ubucukuzi bw’amabuye y’agaciro n’ibindi.

Wuhan Yangluo Port Services Co., Ltd ni ikigo gicungwa n’ikingi kigo kinin cyitwa Wuhan Financial Holdings (Group) Co., Ltd kera cyitwaga Wuhan Economy Development Investment Group Co., Ltd, ubu kikaba cyibanda ku bwubatsi n’ibikorwa Cyambu rusange cya Wuhan.

Wuhan Financial Holdings (Group) Co., Ltd, icunga icyo kigo ni iya Leta yatangiye mu kwezi kwa Kanama 2005 ikaba icungwa n’Ubuyobozi bw’Intara ya Wuhan akaba ari na cyo kigo gishora imari ku nganda zo muri Wuhan.

Guverinoma y’u Rwanda ifitiye icyizere iterambere ry’ubucuruzi n’ishoramari hagati y’u Rwanda n’u Bushinwa, ikaba ishimangira ko u Rwanda ari Igihugu cyubatse izina mu kwakira neza abakigana by’umwihariko abashoramari kuko bahasanga ikirere cyiza cy’ubucuruzi.

Minisitiri w’Ububanyi n’Amahanga n’Ubutwererane Olivier Jean Patrick Nduhungirehe, yavuze ko u Rwanda rwungukiye byinshi muri iri murikagurisha ry’iminsi ine ryabereye mu Mujyi wa Changsha.

Muri iryi murikagurisha ryitabiriwe n’ibigo bisaga 4.700 ndetse n’abarisura babarirwa mu 30.000, u Rwanda rwamuritse ibicuruzwa byiganjemo umwihariko warwo ushingiye ku musaruro ukomoka ku buhinzi.

Nduhungirehe yavuze ko u Rwanda rwiteguye kwakirana yombi abashoramari baturuka mu Bushinwa binyuze muri iri huriro rishingiye ku butwererane mu by’ubucuruzi n’ishoramari.