Umusaza w’umukerarugendo wasuraga Pariki ya Yellowstone muri Leta ya Wyoming muri Leta Zunze Ubumwe za Amerika yakomeretse bikomeye nyuma yo guterwa ihembe n’imbogo y’ingabo yamuteruye ikamujugunya mu kirere muri metero zigera kuri ebyiri n’igice uvuye ku butaka.

Ibi byabaye ku wa 10 Nyakanga 2026 muri Bridge Bay Campground, agace kari hafi ya Fishing Bridge muri Yellowstone National Park, mu gihe imbogo zari mu gihe cyo kororoka, kizwiho gutuma imbogo z’ingabo zirushaho kugira uburakari no kwitwara mu buryo budasanzwe.

Amashusho yafashwe na gafotozi w’umwuga Mike MacLeod agaragaza iyo mbogo yiruka inyura mu nkambi y’abakerarugendo, itera amahembe abantu batandukanye n’ibinyabiziga mbere yo kwerekeza kuri uwo mukerarugendo w’umusaza wari kumwe n’umwuzukuru we.

Nk’uko MacLeod yabibwiye ikinyamakuru Cowboy State Daily, iyo mbogo yari imeze nk’iyarakaye cyane kandi ishaka gutera ihembe ikintu cyose gihuye na yo. Ati “Yari yarakaye cyane, yirukankaga ikintu cyose gihuye na yo.”

Amakuru yatangajwe n’ibitangazamakuru bitandukanye agaragaza ko uwakomerekejwe yitwa Carl Isom-McDaniel. Uyu mugabo yari ari kumwe n’umwuzukuru we, bombi bafata amashusho y’iyo mbogo bari kure yayo nk’uko amabwiriza ya pariki abisaba.

MacLeod yavuze ko nyuma yo kubona imbogo ihagurutse, uyu musaza yabwiye umwuzukuru we ko bagomba kuva aho bari bagahunga.

Bombi bihishe inyuma y’ibiti, ariko imbogo yabanje kurangazwa n’ikamyo yari ihaciye, irayirukankana. Nyuma yo kubona ikamyo igiye, yahise ihindukira yerekeza aho uwo musaza n’umwuzukuru we bari bihishe.

Umwuzukuru yashoboye kwiruka arayicika, ariko sekuru ntiyabashije kuyihunga. Iyo mbogo yamwirukankanye hagati y’ibiti mbere yo kumutera ihembe mu kibuno, imuzamura mu kirere.

MacLeod yagize ati:"Yamufashe mu kibuno ikoresheje ihembe ry’ibumoso, imuterera mu kirere. Yakoze nk’umuzenguruko wuzuye mbere yo kugwira rubavu. Iyo mbogo yari ifite uburebure nibura bwa metero hafi ebyiri, kandi uwo mugabo yari yayirenzeho metero nyinshi."

Amakuru avuga ko uwo mukerarugendo yaterewe mu kirere ku burebure bwa metero zirenga ebyiri (hafi ya metero 2.5), mbere yo kugwa hasi, akagwa nabi.

MacLeod yavuze ko amaze kubona uwo mugabo aguye hasi, yahise areka gufata amashusho yirukankana iyo mbogo ashaka kuyirangaza kuko yatinyaga ko ishobora kongera kumuterura ikamujugunya mu kirere cyangwa ikamukandagira.

Ati"Natinyaga ko ishobora kumusogota cyangwa ikamukomeretsa kurushaho ari hasi. Nahise mpagarika gufata amashusho, nirukankana iyo mbogo nyisakuriza ngerageza kuyitera ubwoba."

Abandi bakerarugendo bari hafi na bo batangiye gusakuza no kuyegera, bituma iyo mbogo iva aho yari iri, biha ubutabazi umwanya wo kugera kuri uwo mugabo.

Umwuzukuru w’uwakomeretse yavuze ko sekuru yakomeretse bikomeye, cyane cyane mu kibuno no ku kuguru, ndetse ko ubuzima bwe bwari bukiri mu kaga. Yahise ajyanwa kwa muganga kugira ngo ahabwe ubuvuzi bwihuse.

Nubwo Ishami rya Leta Zunze Ubumwe za Amerika rishinzwe Pariki z’Igihugu (National Park Service) ritigeze ritangaza amakuru arambuye ku byabaye, rikomeje gukangurira abasura Yellowstone kutegera inyamaswa zo muri iyi pariki, kabone n’iyo zaba zisa n’izituje.

Amabwiriza ya pariki asaba abantu kuguma nibura muri metero 23 uvuye ku nyamaswa nini nk’imbogo n’impongo, mu gihe ku nyamaswa z’inkazi zirimo idubu, impyisi n’intare zo mu misozi basabwa kuguma nibura muri metero 90.

Ku rubuga rwa Yellowstone handitse ko "inyamaswa zose zo muri iyi pariki ari inyamaswa zo mu gasozi kandi zishobora guteza akaga, kabone n’iyo zaba zisa n’izituje."

Icyakora, MacLeod yavuze ko uko yabibonye, uwo mukerarugendo yari yubahirije amabwiriza ya pariki kuko atari yegereye imbogo. Ati: "Nta muntu nabonye uyegera. Abantu bahoraga baburirana bavuga bati: ’Mwitonde, imbogo irimo kuza,’ kandi bose bakomeje kuguma mu ntera yemewe."

Iki ni igitero cya kabiri imbogo ikoze ku muntu muri Yellowstone kuva umwaka wa 2026 watangira. Icya mbere cyabaye ku wa 26 Kamena, ubwo umwana w’imyaka 12 yakomeretswaga n’indi mbogo hafi ya Mud Volcano, na we akajyanwa kwa muganga.

Abashinzwe iyi pariki bibutsa ko mu gihe cyo kororoka, imbogo z’ingabo zikunda kurushaho kugira uburakari no kwitwara mu buryo butunguranye, bityo abasura Yellowstone bagasabwa gukomeza kwitwararika no gukurikiza amabwiriza y’umutekano.