Ikigo cy’Igihugu cy’Iteganyagihe (Meteo Rwanda) cyatangaje ko mu minsi 10 ya mbere ya Mutarama 2026 hateganyijwe imvura iri hagati ya milimetero 7 na 80 ikaba iri ku kigero cy’impuzandengo y’isanzwe igwa muri icyo gihe.

Biteganyijwe ko umubare w’iminsi imvura izagwamo uri hagati y’iminsi ibiri n’ine bitewe n’imiterere ya buri hantu.

Imvura iteganyijwe izaturuka ku isangano ry’imiyaga iva mu gice cy’amajyepfo y’Isi rigana mu karere u Rwanda ruherereyemo.

Imvura iri hagati ya milimetero 61 na 80 iteganyijwe mu Ntara y’Iburengerazuba, mu majyaruguru y’uburengerazuba bw’Akarere ka Burera no mu Turere twa Musanze, Nyamagabe na Nyaruguru.

Imvura iri hagati ya milimetero 43 na 61 iteganyijwe mu majyaruguru y’uturere twa Bugesera na Ngoma, mu burengerazuba bw’Uturere twa Rwamagana na Gatsibo, mu Mujyi wa Kigali, iy’Amajyepfo n’iy’Amajyaruguru uretse mu bice by’amajyaruguru y’Akarere ka Gicumbi n’igice gito cy’uburasirazuba bw’Akarere ka Burera.

Mu gihe imvura iri hagati ya milimetero 25 na 43 iteganyijwe ahasigaye mu turere twa Burera, Gicumbi, Rwamagana, Bugesera na Ngoma no mu burengerazuba bw’uturere twa Kirehe, Kayonza, Gatsibo na Nyagatare naho ahasigaye mu turere twa Kirehe, Kayonza, Gatsibo na Nyagatare hateganyijwe imvura iri hagati ya milimetero 7 na 25.

Meteo Rwanda kandi yatangaje ko ubushyuhe bwo hejuru buteganyijwe buzaba buri hagati ya dogere Selisiyusi 21 na 29, naho ubushyuhe bwo hasi buteganyijwe buzaba buri hagati ya dogere Selisiyusi 9 na 18.

Umuyaga uringaniye ushyira kuba mwinshi ufite umuvuduko uri hagati ya metero 4 na 12 ku isegonda, uteganyijwe mu bice bitandukanye by’Igihugu.