Ihuriro ry’Ingabo za Repubulika Iharanira Demokarasi ya Congo na AFC/M23 ryasubukuye imirwano mu bice byo mu Ntara ya Kivu y’Amajyepfo nyuma yo kumvana imitsi ku wa 2 Ukuboza 2025.

Iyi mirwano ihanganishije abarwanyi ba AFC/M23 n’ingabo za RDC zifatanyije na Wazalendo n’ingabo z’u Burundi iri kubera mu gace ka Lubarika na Katogota muri teritwari ya Uvira na Kaziba muri Walungu kuva mu gitondo cyo kuri uyu wa 3 Ukuboza.

Amakuru ava muri Kivu y’Amajyepfo avuga ko abaturage benshi batuye muri Katogota bari guhunga bajya mu mu bice birimo santere ya Kamanyola imaze amezi hafi 10 igenzurwa na AFC/M23.

Kubera urusaku rwinshi rw’amasasu ruri kumvikana muri Katogota, hari bamwe mu batuye mu duce two muri Kamanyola nka Kambara na Rugenge bafashe icyemezo cyo guhungira kure yaho.

Ku wa 2 Ukuboza, ibice byinshi bya Kivu y’Amajyepfo birimo Katogota, Luvungi na Lubarika muri Uvira, Kaziba muri Walungu no mu bice bikoze ku muhanda uhuza Kasita na santere ya Mwenga byabereyemo imirwano ikomeye.

Umuvugizi wa AFC/M23, Lawrence Kanyuka, yashinje ihuriro ry’ingabo za Leta ya RDC gutangiza iyi mirwano, avuga ko zarashe ibisasu muri santere ya Kamanyola, zica abasivili batatu, abandi batanu barakomereka.

Muri sheferi ya Kaziba, hari abaturage bane bo mu muryango umwe bapfiriye mu gace ka Burherere kari muri gurupoma ya Mucingwa, abandi batandatu bapfira muri gurupoma ya Muhumba.

Umuvugizi w’Ingabo za RDC, Gen Maj Sylvain Ekenge, na we yashinje AFC/M23 kurenga ku masezerano y’agahenge yasinyiwe i Doha muri Qatar, kuko ngo ni yo yarashe ku birindiro byazo muri Luvungi, Lubarika na Katogota.

Ingabo za RDC zarashe ibisasu ku nzu z’abaturage muri Kamanyola na Kaziba, zica abaturage benshi