Polisi yo muri Kenya yakoresheje imyuka iryana mu maso mu gutatanya imyigaragambyo yamaganaga iyubakwa ry’ikigo kizajya cyita ku Banyamerika bashobora kwandura Ebola, imyigaragambyo yabereye mu mujyi wa Nanyuki uri hagati mu gihugu.

Abigaragambyaga bagendaga mu matsinda mato, bazunguza amabendera ya Kenya, bitwaje isanduku yanditseho ijambo "Ebola", ndetse bafite n’ibyapa basaba ko uwo mushinga uhagarikwa.

Mu cyumweru gishize, abantu babiri bishwe barashwe igihe polisi yatatanyaga indi myigaragambyo nk’iyo.

Uwo mushinga wa Leta Zunze Ubumwe za Amerika watumye abaturage benshi bagira impungenge ku byago byo gukwirakwiza Ebola hagati y’ibihugu ndetse no ku kuba leta itaratanga ibisobanuro bihagije kandi bisobanutse ku mikorere y’icyo kigo.

Mu kwezi gushize, urukiko rukuru rwategetse ko ibikorwa byo kubaka icyo kigo bihagarara nyuma y’uko umuryango uharanira uburenganzira bwa muntu utanze ikirego uvuga ko icyo kigo gishobora kugira ingaruka zikomeye kandi zihuse ku buzima bw’abaturage.

Umwe mu bigaragambyaga, Priscilla Imani, yabwiye Reuters ko uwo mushinga wa Amerika wamaze kugira ingaruka ku mujyi wa Nanyuki no ku ntara ya Laikipia kuko abantu batangiye gutinya kuhagendera.

Yagize ati: "Ubutumwa bwanjye ni ubu: Laikipia si ubutayu, kandi ijwi ryacu rigomba kumvikana."

Ikigo giteganyijwe kwakira cyangwa kuvura abantu bashobora kwandura Ebola kizaba gifite ibitanda 50 n’abaganga b’Abanyamerika. Kizaba kigenewe kuvura cyangwa kwakira Abanyamerika bazandurira Ebola mu cyorezo giherutse kwaduka muri Democratic Republic of the Congo. Umuyobozi wo muri Amerika yabwiye BBC ko Kenya yatoranyijwe kubera iri hafi y’akarere kibasiwe n’icyo cyorezo kandi ko ibibuga by’indege byo muri ako karere bidafite ubushobozi buhagije. Yavuze kandi ko guhitamo Kenya bizafasha kuvura vuba Abanyamerika bashobora kwandura.

Umujyi wa Bunia, aho iki cyorezo cya Ebola cyatangiriye, uri ku ntera ya kilometero 780 uvuye i Nanyuki, hagati hakaba hari Uganda.

Abashinzwe ubuzima muri DRC batangaje ko kugeza ku wa 7 Kamena 2026, abantu 550 bari bamaze kwemezwa ko banduye Ebola. Ibyo bivuze ko habonetse abandi 35 mu masaha 24 yari ashize.

Iki cyorezo kimaze guhitana abantu 101 muri DRC, mu gihe abantu 309 bakiri mu bitaro cyangwa mu bigo bari kwitabwaho.

Ebola imaze gukwira mu turere tw’ubuzima 25 two mu ntara eshatu za DRC: Ituri (uturere 17), North Kivu (uturere 7) na South Kivu (akarere kamwe).

Ariko kugeza ubu, nta muntu n’umwe wanduye Ebola uraboneka muri Kenya.

Perezida wa Kenya, William Ruto, yashyigikiye uwo mushinga avuga ko Amerika ari yo yawusabye kandi ko kuwanga byari kuba nko kubura ubumuntu.

Yasabye Abanyakenya kutinjiza politiki muri iki kibazo gikomeye cya Ebola, anasaba abanyapolitiki kwirinda amagambo adatekerejweho neza ku bijyanye n’iyi ndwara.

Amashusho BBC yabonye yafashwe n’ibyogajuru yerekana ko ibikorwa byo kubaka icyo kigo byakomeje ku kibuga cy’indege cya gisirikare, nubwo urukiko rwari rwategetse ko bihagarara.

Mu cyumweru gishize, umwe mu bayobozi ba Amerika yavuze ko ubuyobozi bwa Amerika buzi icyo kirego kiri mu rukiko, ariko ko bizeye ko bazagishakira umuti.