Impunzi z’Abanye-Congo zibarizwa mu nkambi zo Burundi, zigowe n’ibibazo by’ubuzima ku buryo abagera ku 105 bamaze kwitaba Imana mu byumweru bibiri bishize.

Ni amakuru yatangajwe n’Umuryango ‘Citizens’ Organization for Peace and Community Coexistence (CPCC)’ muri raporo wasohoye ku wa mbere tariki ya 5 Mutarama 2026.

Muri raporo uyu muryango wasohoye, Umuyobozi wawo, Ahadi Bya Masu, yavuze ko “ubuzima impunzi zibayemo buteye ubwoba, abagera kuri 105 bamaze gupfa mu nkambi zitandukanye”, biturutse ku kubura aho kuryama hahagije, kubura serivisi z’ubuvuzi, no kubura ubundi butabazi.

Yavuze kandi ko rimwe na rimwe baterwa n’abitwaje intwaro zirimo imyambi.

Imiryango yita ku bababaye ivuga ko abaturage 50,000 ba Repubulika Iharanira Demokarasi ya Congo bahungiye mu Burundi mu bice bya Cibitoke na Bukinanyana kuva tariki ya 5 Ukuboza 2025.

Aba bavaga mu bice bya Uvira n’inkengero zaho bahunga imirwano yari ihanganishije igisirikare cya Congo n’abarwanyi ba AFC/M23.

Izo mpunzi zigeze mu Burundi, zakomerewe n’ubuzima nyuma y’uko aho zahungiye ubutegetsi bwaho bwagaragaje ko bwatunguwe no kwakira impunzi.

Mu Kuboza 2025, Minisiteri y’umutekano mu Burundi yasohoye itangazo isaba abaterankunga ubufasha bwo kwita kuri izo mpunzi.

Izo mpunzi gusubira muri Congo bisa n’ibidakunda nyuma y’uko u Burundi bufunze imipaka ibuhuza na Repubulika Iharanira Demokarasi ya Congo.

Abategetsi mu Burundi bavuga ko imipaka ya Gatumba n’uwa Vugizo izafungurwa mu gihe umutekano uzaba wagarutse ntacyo bikanga.

Ihuriro AFC/M23 rishinja u Burundi “gukubita byo kwica” impunzi zishaka gusubira iwabo.

Amashusho akwirakira ku mbuga nkoranyambaga agaragaza impunzi zambuka amazi y’uruzi rwa Rizizi zikoresheje imajerekani, zishaka gusubira muri Repubulika Iharanira Demokarasi ya Congo.