Ihuriro AFC/M23 rirwanya ubutegetsi bwa Repubulika Iharanira Demokarasi ya Congo ryatangaje ko ingabo za Leta zatsindiwe mu gace ka Kawele kari hafi ya santere ya Rubaya, zitwika inzu z’abaturage.

Kawele iherereye muri sheferi ya Bahunde muri teritwari ya Masisi, mu ntera y’ibilometero bibarirwa mu 10 uvuye muri Rubaya; igice gikungahaye ku mabuye y’agaciro ya Coltan.

Ku wa 26 Gashyantare 2026, AFC/M23 yakuye ingabo za RDC n’imitwe wa Wazalendo muri Kawele, ifata mpiri bamwe mu barwanyi bo ku ruhande rwa Leta mu gihe bageragezaga guhunga.

Umuvugizi wa AFC/M23, Lawrence Kanyuka, yatangaje ko ubwo abasirikare cyangwa abarwanyi bo ku ruhande rwa Leta bahungaga, batwitse inzu nyinshi z’abaturage zigamije kubatera ubwoba no kubababaza.

Kanyuka yagize ati "Mbere y’uko bava muri Kawele muri teritwari ya Masisi ahagana saa cyenda z’umugoroba ku wa 26 Gashyantare 2026, mu cyo bita mu buryo butari bwo ‘repli strategique’, ihuriro ry’ingabo za Leta ya Kinshasa ryatwitse ku bwinshi inzu z’abaturage n’imitungo by’abasivili, bibatera ubwoba n’ububabare.”

AFC/M23 yasobanuye ko abafashwe mpiri bavuze ko abayobozi babo barimo uwitwa Mutayomba ari bo batanze amabwiriza yo gutwika umudugudu wose, ibishimangira ko iki gikorwa cy’ubugizi bwa nabi cyari cyateguye.

Ibice bikikije Rubaya bimaze iminsi biberamo imirwano ikomeye. Ingabo za RDC ziri kwifashisha intwaro ziremereye na drones, abo muri Wazalendo bakarwanira ku butaka, intego ari ukwisubiza iki gice kigenzurwa na AFC/M23 kuva muri Gicurasi 2024.

AFC/M23 yamenyesheje Abanye-Congo n’umuryango mpuzamahanga ko Leta ya RDC ikomeje kurenga ku masezerano y’agahenge, ikenyegeza intambara ishyira ubuzima bw’abaturage mu kaga kurushaho.