Minisiteri y’Ibikorwaremezo yateganyije ko mu mwaka w’ingengo y’imari wa 2025/26, ingo z’Abaturarwanda zirenga ibihumbi 260 zizahabwa umuriro w’amashanyarazi, umubare munini bakazafatira ku muyoboro mugari.

Abakora ingendo zerekeza mu ntara mu masaha y’ijoro, babona neza ko amashanyarazi amaze gukwirakwira no mu bice hafi ya byose by’igihugu, kuko ingo nyinshi ubona zicanye amashanyarazi akomoka ku muyoboro mugari, ahandi bagacana ingufu zikomoka ku mirasire y’izuba.

Ubushakashatsi ku mibereho rusange y’ingo mu Rwanda, EICV 7, bugaragaza ko ingo zifite amashanyarazi mu Rwanda zikubye kabiri ziva kuri 34% mu 2017 zigera kuri 72%.

Imibare ya EICV 7 igaragaza ko ingo zituye ku mudugudu, bivuze ko ari zi byoroshye cyane kugerwaho n’ibikorwaremezo byose ari 68%.

Inyandiko y’imihigo ya Minisiteri y’Ibikorwaremezo y’umwaka wa 2025/26 igaragaza ko ingo zimaze guhabwa amashanyarazi afatiye ku muyoboro mugari mu gihugu hose zirenga miliyoni 2,1 mu gihe ingo zifite amashanyarazi akomoka ku mirasire y’izuba zirenga ibihumbi 893.

Imibare igaragaza ko muri uyu mwaka w’ingengo y’imari uzarangira muri Kamena 2026, ingo 210.898 zizahabwa amashanyarazi afatiye ku muyoboro mugari, naho izirenga ibihumbi 50 zikazahabwa akomoka ku mirasire y’izuba.

Ibikorwa byo kugeza amashanyarazi ku miryango itandukanye mu gihugu muri uyu mwaka byagenewe arenga miliyari 110,4 Frw.

Guverinoma y’u Rwanda yatangaje ko kugeza mu 2029 izashyira imbaraga mu kugeza amashanyarazi mu tugari twose tw’igihugu.

Muri Kanama 2025 ubwo Minisitiri w’Intebe, Dr. Justin Nsengiyumva, yagezaga ku Nteko Ishinga Amategeko gahunda ya Guverinoma y’imyaka itanu,yavuze ko Leta izashyira imbaraga mu gukwirakwiza amashanyarazi mu tugari twose tw’igihugu.

Yagize ati: “Kugira ngo ibi bizagerweho, hazongerwa imbaraga mu gukwirakwiza amashanyarazi hirya no hino mu Gihugu. Hazibandwa ku nganda, inzu z’ubucuruzi, amashuri, ibigo by’ubuvuzi, n’ibindi bigira uruhare mu iterambere n’imibereho myiza y’abaturage.”

Abaturage bo mu karere ka Burera, mu mudugudu wa Kikubo, Akagari ka Nyamabuye, umurenge wa Kagogo, bahawe amashanyarazi mu 2025, bavuga ko ubuzima bwahise buhinduka ndetse ibikorwa by’iterambere bajyaga gushakira kure yabo batangira kubibona hafi.

Ayigihugu Jean Baptiste ati: “Ibikorwa by’iterambere byaratangiye, twajyaga gushesha [imyaka] twambutse hakurya iriya mu Gitare, watuma umwana ukaba ufite ubwoba ko imodoka imugonga ariko ubu twatangiye kubona imashini zisya, ubu dufite imashini ebyiri hano mu gasantere zisya, abana bari kogosha, ubu bari gusudira inzugi nta kibazo.”

Yashimangiye ko amashanyarazi yahinduye byinshi birimo n’uburezi bw’abana babo, bakabibonera no mu mitsindire yabo kuko ubu bashobora gusubiramo amasomo neza.

Inama y’Abaminisitiri yo ku wa 15 Nzeri 2025 yamenyeshejwe ko ingo zigerwaho n’amashanyarazi ziyongereye zikagera kuri 85% mu mwaka wa 2025 mu gihe zari munsi ya 2% mu 2000.

Ingo ibihumbi 260 zizahabwa amashanyarazi mu 2025/26