Abarwanyi b’umutwe wa ADF urwanya ubutegetsi bwa Uganda bishe abasivili 20 mu Ntara ya Ituri mu burasirazuba bwa Repubulika ya Demokarasi ya Congo.

Sponsored Ad

Umuyobozi wa polisi muri ako gace wavuganye na AFP yavuze ko abo bishwe bari babanje gutwarwa bunyago mu gitero ADF yagabye ahitwa Babila Babombi kuwa kabiri.

Mu bishwe harimo abagabo 16 n’abagore bane, mu gihe abandi bantu bane bashoboye gutoroka abo barwanyi ubu bakaba barimo kwitabwaho n’abaganga mu bitaro kuko bari batemaguwe.

ADF irwanya ubutegetsi muri Uganda imaze imyaka hafi 30 yarashinze ibirindiro byayo mu burasirazuba bwa Congo.

Mu 2019, ADF yemeje ko ikorana na Leta ya Kiyisilamu kandi ishinjwa gukora ubwicanyi muri Congo no muri Uganda, ingabo z’ibi bihugu zikaba zimaze hafi imyaka itatu zitangije Ibikorwa bihuriweho byo guhiga Abagize uyu mutwe mu mashyamba ya Congo.