Guverinoma ya Uganda iteganya gukoresha miliyari 9 z’Amashilingi (arenga miliyari 3,5) mu bikorwa by’umuhango w’irahira rya Perezida Yoweri Kaguta Museveni.

Ni ibirori biteganyijwe ku wa 12 Gicurasi 2026. Bizabera ahazwi nka Kololo Ceremonial Grounds mu Murwa Mukuru, Kampala.

Bizitabirwa n’abakuru b’ibihugu 35 n’abandi bayobozi 30 bo ku rwego rw’abadipolomate.

Televiziyo yo muri Uganda, NBS, yatangaje ko “Perezidansi ya Repubulika iteganya kuzakoresha miliyari 9 z’Amashilingi ya Uganda (arenga miliyari 3,5 Frw) mu muhango w’irahira rya Perezida Yoweri Kaguta Museveni uhereutse gutorerwa kuyobora Uganda kuva mu 2026 kugeza 2031.”

Muri rusange ibi birori by’irahira ry’uyu muyobozi wafashe ubutegetsi mu 1986, bizitabirwa n’abagera ku bihumbi 40.

Mu rwego rwo korohereza abaturage bashaka kuzakurikirana uyu muhango, Leta ya Uganda izatanga ikiruhuko kuri uwo munsi.

Muri Mutarama 2026 ni bwo Perezida wa Uganda, Yoweri Kaguta Museveni, yongeye gutsinda amatora y’Umukuru w’Igihugu ku majwi 71,6%, ahigitse abandi bakandida barindwi bari bahatanye.

Amatora ya Perezida wa Uganda yabaye tariki ya 15 Mutarama 2026. Komisiyo y’amatora igaragaza ko mu bantu miliyoni 21,6 bari kuri lisiti y’itora, 52,5% ari bo bayitabiriye.