Joseph Kabila wayoboye Repubulika Iharanira Demokarasi ya Congo kuva mu 2001 kugeza mu 2019, ku wa 2 Kamena 2025 yahuye n’abahagarariye urubyiruko n’intumwa z’umunyapolitiki Franck Diongo utavuga rumwe n’ubutegetsi bw’iki gihugu.

Sponsored Ad

Kabila yakiriye mu rugo rwe ruherereye ahitwa Kinyogote hafi y’umujyi wa Goma mu ntara ya Kivu y’Amajyaruguru, intumwa za Diongo zaturutse mu Bubiligi, Canada, u Buholandi, u Budage n’u Busuwisi.

Urubuga Reconstruire RDC rwashinzwe na Kabila rwasobanuye ko izi ntumwa zihuriye mu ishyaka MRC riharanira impinduka, zagaragagaje ko zishaka gutanga umusanzu mu gufasha iki gihugu cyahungabanye mu nzego zitandukanye.

Uru rubuga rwasobanuye ko Kabila yanakiriye imiryango y’urubyiruko rw’i Goma, arusaba gutanga umusanzu warwo kugira ngo RDC idacikamo ibice, rukubaka amahoro ashingiye ku bumwe, ukuri n’ubufatanye, rukirinda abashaka kurukoresha.

Ubwo Kabila yagezaga ijambo ku Banye-Congo tariki ya 23 Gicurasi 2025, yagaragaje ibintu 12 byafasha RDC kugira amahoro, iterambere ndetse no kubana neza n’ibihugu by’abaturanyi.

Muri byo harimo guhagarika intambara, gukura ingabo z’amahanga muri RDC, gusenya imitwe yitwaje intwaro yose ikorera muri iki gihugu, ubwiyunge bw’Abanye-Congo, ibiganiro n’ubufatanye n’ibihugu by’ibituranyi hagamijwe amahoro n’iterambere rirambye.