Ubuyobozi bw’Akarere ka Kayonza, butangaza ko bwatangiye umushinga wo kuhira imyaka hifashishijwe damu, uzatwara arenga miliyari 4.5 Frw, hagamijwe guhangana n’amapfa

Muri ayo mafaranga, miliyari 3 Frw zizakoreshwa mu kubaka ibikorwaremezo, mu gihe asigaye azakoreshwa mu gutera imbuto no kuzibungabunga mu gihe cy’imyaka itatu.

Ni umushinga uzafasha abaturage bo mu Mirenge ya Rwinkwavu na Kabare bakunze kwibasirwa n’amapfa.

Mu Murenge wa Rwinkwavu hazuhirwa hegitari 5,000, mu gihe mu gace ka Gishanda hazuhirwa hegitari 200.

Umuyobozi w’ umushinga wa KIIWP( Kayonza Irrigation and Integrated watershed management Project), uzafasha mu kubaka iyo damu,Uwitonze Théogène , avuga ko baturage bagera kuri 560 ari bo bazungukira muri uyu mushinga ndetse ko Iyi damu ifite ubushobozi bwo kubika amazi angana na metero kibe miliyoni imwe (1,000,000 m³) .

Ati ” Ibikoresho tuzakoresha mu kuhira, tuzazana amamashini akoresha imirasire y’izuba, tuzamure amazi tuzaba twabitse, tuyajyane hejuru ku dusozi, amazi amanukire mu turobini tuzaba turi mu mirima, abaturage buhire imirima izaba yahinzwe.”

Akomeza ati ” Ibidamu kubyubaka byaratangiye ndetse no gushyiramo amatiyo azuhira imyaka na byo biri mu nzira kuko byinshi biraturuka hanze. Mu gihe cy’ukwezi bizaba byamaze kuza, imirimo yose itangire.”

Uwitonze Théogène asobanura ko hazuhirwa imyaka ndetse n’ibiti by’imbuto bizaba byavanzwe n’imyaka ,agasaba abaturage kuzagira uruhare muri uyu mushinga.

Umuyobozi w’Akarere ka Kayonza, Fred Hategikimana, yavuze ko abaturage bazakorera ubuhinzi mu Cyanya cya Gishanda, bazafashwa mu kububakira ubushobozi mu gihe cy’imyaka itatu.

Ati ” Biracyari kunozwa ariko kandi no gukomeza kwegera abaturage ,tubereka ko leta izakomeza kubafasha kuhira.”

Yongeyeho ko mu karere ka Kayonza hari Imishinga itandukanye izafasha abaturage kuhira mu mirenge ya Ndego, Kabarondo, Ruramira na Nyamirama mu rwego rwo gufasha abaturage kwihaza mu biribwa.

Uyu mushinga wo kuhira hifashishijwe idamu, uzafasha aba baturage mu gihe mu bihe bitandukanye bakunze kwibasirwa n’amapfa aterwa n’izuba ryinshi.