Abanyeshuri icyenda bo muri Kenya bashinjwa gutwika inyubako bararamo irimo bagenzi babo hagapfa 16, bagejejwe imbere y’urukiko kuri uyu wa 02 Kamena 2026.

Abo bakobwa barashinjwa gucura no gushyira mu bikorwa uwo mugambi ku ishuri ryabo rya Utumishi Girls School riherereye ahitwa Gilgil hagati muri Kenya.

Urukiko rukuru rwo mu gace ka Naivasha rwatangaje ko ku wa 03 Kamena 2026 ari bwo ruzafata icyemezo ku ifunga n’ifungurwa by’agateganyo mu gihe iperereza rikomeje.

Ibyaha bishinjwa aba banyeshuri n’imyifatire yo gutwika inzu iryamyemo bagenzi babo hagati mu ijoro ni inkuru ikirimo kugarukwaho cyane muri Kenya.

Abakora iperereza basabye indi minsi 30 yo gukomeza akazi kabo kuri iki gikorwa bakekwa ko cyaba cyarimo n’abandi bantu.

Umuriro mu nyubako iraramo abannyeshuri (dortoire) kuri icyo kigo watwitse igice cy’iyo nzu cyarimo ibitanda 135 kiraramo abanyeshuri 202.

Abakora iperereza bavuga ko abashinzwe ishuri bananiwe gufungura umuryango w’ubutabazi (emergency exit) w’iyo nzu bigatuma abanyeshuri babyiganira mu muryango umwe bahunga umuriro.

Abanyeshuri icyenda(9) bashinjwa bamaze iminsi itanu bafunze.

Abakora iperereza bavuga ko umuriro wavuye ku gukongeza umufariso/imatera ku gitanga kiri hafi y’umuryango usohoka, hakoreshejwe peteroli n’ikibiriti.

Amashusho ya CCTV yo muri iyo ‘dortoire’ yarekanye abanyeshuri batandatu bagize uruhare mu gucana uwo muriro bo bagahita basohoka.

Uretse abapfuye uwo muriro wakomerekeke abandi 79.

Kugeza ubu ntiharamenyekana impamvu yateye aba banyeshuri gukora ibi.

Hagati aho, abapfuye bamwe barahiye ku buryo batamenye imyirondoro yabo, gusa hitabajwe ibipimo bya DNA ibisubizo byabyo bikaba bitegerejwe ku wa 03 Kamena 2026.