Urukiko Rukuru rwa Milimani i Nairobi rwahamije uwahoze ari Guverineri w’Akarere ka Migori, Zachary Okoth Obado, hamwe n’abo bareganwaga, icyaha cyo kwica Sharon Otieno, umunyeshuri wa kaminuza bivugwa ko yigeze kugirana na we umubano w’urukundo.

Mu mwanzuro wasomwe kuri uyu wa Kane unanyuzwa kuri televiziyo zo muri Kenya, urukiko rwahamije kandi uwahoze ari umufasha wa Obado, Michael Oyamo, ndetse n’uwahoze ari umwanditsi w’Akarere ka Migori, Caspal Obiero, icyaha cy’ubwicanyi.

Umucamanza Cecilia Githua yavuze ko ubushinjacyaha bwagaragaje ibimenyetso bihagije bishimangira ko Obado n’abo bareganwaga bahamwa n’icyaha.

Yagize ati: “Ubushinjacyaha bwagaragaje ibyaha biregwa uregwa wa mbere, uwa kabiri n’uwa gatatu. Ndasanga buri wese muri bo ahamwa n’icyaha cy’ubwicanyi.”

Nk’uko ibitangazamakuru byo muri Kenya byabitangaje, umucamanza yavuze ko Obado yari afite impamvu yo gushaka ko Sharon Otieno yicwa kandi ko ari we wateguye umugambi wo kumwivugana.

Obado, Oyamo na Obiero bakomeje gufungwa by’agateganyo mu gihe bategereje igihano bazakatirwa.

Umwunganizi mu mategeko w’umuryango wa Sharon yavuze ko bishimiye icyemezo cy’urukiko, agaragaza ko bizeye ko ubutabera bwabayeho.

Sharon Otieno wari ufite imyaka 26 yashimuswe mbere yo kwicwa mu mwaka wa 2018. Umurambo we wabonetse mu gihuru hafi y’umujyi wa Oyugis mu burengerazuba bwa Kenya.

Raporo y’isuzuma ry’umurambo yagaragaje ko mbere yo kwicwa ashobora kuba yarafashwe ku ngufu, agaterwa ibyuma inshuro umunani mu ijosi, mu nda no mu mugongo. Icyo gihe yari atwite, ndetse n’umwana yari atwite yapfiriye mu nda.

Uru rubanza rwabaye rumwe mu zakurikiwe cyane muri Kenya kubera uburemere bwabwo n’imiterere yarwo.