Igisirikare cya Kenya kirwanira mu kirere cyakiriye drones z’intambara zo mu bwoko bwa Bayraktar TB2 zisanzwe zikorwa n’uruganda rwa Baykar Defence rw’Igisirikare cya Türkiye.

Sponsored Ad

Drones esheshatu ni zo Kenya yamaze kwakira nk’uko amakuru abivuga.

Mbere yo kwakira izi drones, abasirikare b’abanya-Kenya babanje kujya kwigishirizwa muri Türkiye kuzikoresha.

Muri Kanama uyu mwaka ni bwo Baykar Defence yatangaje ko yagurishije Kenya ziriya ndege zitagira abapilote.

Drones zo mu bwoko bwa Bayraktar TB2 ni zimwe mu ndege nto z’intambara zigezweho muri iki gihe kubera umwihariko zifite, by’umwihariko mu bijyanye no kugaba ibitero.

Izi drone mu busanzwe zifite ubushobozi bwo kuguruka amasaha 27, ikindi zikaba zishobora gutwara ibisasu biciriritse.

Kenya yitezeho kuzifashisha mu gukora ubutasi no kongera imbaraga mu bijyanye no kurwanya ibitero by’imitwe yitwaje intwaro ishobora kugabwaho; by’umwihariko iby’umutwe wa Al Shabaab.

Iki gihugu kiriyongera ku bindi bihugu bya Afurika bitunze drones za Bayraktar TB2 birimo Niger, Togo, na Ethiopia.

U Rwanda mu minsi ishize na rwo byavuzwe ko rwaba ruri mu biganiro byo kuba rwagura ziriya drones zigura ari hagati ya $ miliyoni 2 na 5.