Ku wa Kabiri tariki ya 3 Kamena, Polisi y’u Rwanda yakiriye ku cyicaro gikuru ku Kacyiru, abanyeshuri 223 bo mu bigo by’amashuri abanza bitatu byo mu Mujyi wa Kigali rugamije kubungura ubumenyi ku nshingano n’uruhare rwayo mu kubungabunga umutekano n’ituze rusange by’abaturarwanda.

Sponsored Ad

Baherekejwe n’abarimu babo n’abayobozi b’ishuri, abanyeshuri bo mu kigo cy’amashuri abanza cya Saint Gabriel giherereye i Remera mu Karere ka Gasabo, Ikigo Rise to Shine cyo mu murenge wa Masaka mu Karere ka Kicukiro n’Ikigo Saint Anne de Kigali nacyo cyo mu Karere ka Kicukiro, bahawe ikaze n’umuyobozi w’Ishami rishinzwe ibikorwa bya Polisi n’ituze rusange, Commissioner of Police (CP) George Rumanzi, mbere y’uko bahabwa inyigisho ku mikorere ya Polisi y’u Rwanda.

Basuye amashami atandukanye ya Polisi y’u Rwanda arimo; Ishami rishinzwe kurwanya inkongi n’ubutabazi (Fire & Rescue Brigade), Ishami rya Polisi ryifashisha imbwa mu gucunga umutekano (Canine Brigade), Ishami rishinzwe umutekano wo mu muhanda (TRS) n’Ishami rishinzwe kugenzura ikoranabuhanga ryifashishwa mu gucunga umutekano (CCC).

Beretswe imikorere ya buri shami n’ibikoresho byifashishwa mu bikorwa byo gucunga umutekano w’abaturage no kurengera ubuzima bw’abari mu kaga nk’abahuye n’impanuka, abagwiririwe n’inkongi n’ibindi biza bitandukanye bagahabwa ubutabazi bwihuse, imikorere y’imbwa zifashishwa mu gusaka ibiyobyabwenge n’ibiturika byakwifashishwa mu guhungabanya umutekano n’uburyo bw’ikoranabuhanga bugezweho mu kugenzura ibyaha n’amakosa yo mu muhanda.

CP Rumanzi yabashimiye kuba bahisemo gusura Polisi y’u Rwanda, ashimangira ko ari intambwe nziza bateye ibafasha kurushaho gusobanukirwa no guha agaciro umutekano nk’abayobozi b’ejo hazaza.

Yagize ati: “Nk’abakiri bato; aya ni amahirwe abafasha gukura musobanukiwe icyo bisaba kandi mwumva neza uruhare rwa buri wese mu guharanira umutekano n’ituze rusange birambye.”

Chantal Bamurange, umwe mu barimu bari baherekeje abanyeshuri, yashimiye Polisi y’u Rwanda kuba yaremeye ubusabe bwabo, avuga ko banejejwe n’ uru rugendoshuri bitewe n’uko rubamaze amatsiko bari bafite ku bijyanye n’uko inshingano zijyanye n’umutekano zishyirwa mu bikorwa binyuze mu mashami atandukanye basuye.