Polisi ikorera mu Mujyi wa Kigali ifatanije n’inzego zitandukanye zirimo Urwego rw’Ubugenzacyaha, Urwego rw’ubushinjacyaha, Inzego z’ibanze n’abaturage, yakoze igikorwa cyo kwangiriza mu ruhame ibiyobyabwenge n’ibicuruzwa bitemewe byafatanywe abaturage babicuruza mu bihe bitandukanye mu Mujyi wa Kigali bifite agaciro ka Mliyoni 61,701,740 Frw.

Iki gikorwa cyabereye mu Murenge wa Nduba ahasanzwe hajyanwa imyanda ikusanywa mu mujyi wa Kigali ku wa Gatatu tariki ya 20 Mata 2026.

Umuvugizi wa Polisi mu mujyi wa Kigali CIP Wellars Gahonzire, yatangaje ko ibiyobwange n’ibindi bicuruzwa bitemewe byangijwe byari bibitse muri sitasiyo zitandukanye za Polisi zo mu Mujyi wa Kigali.

Ibyangijwe birimo ibiro 352 by’umogi, Litiro 1203 za Kanyanga, Inzoga z’inkorano zitujuje ubuziranenge z’amoko atandukanye, ibiribwa, ibinyobwa bitandukanye, n’amavuta atukuza azwi nka Mukorogo n’ibindi bitandukanye

CIP Gahonzire yatangaje ko ibi biyobyabwenge n’ibicuruzwa bitemewe byafatanywe abaturage bo mu Mirenge itandukanye igize Umujyi wa Kigali mu bihe bitandukanye biturutse ku makuru yatanzwe n’abaturage.

Yashimangiwe ko abaturage babifatiwemo bakorewe amadosiye bashyikirizwa ubutabera.

Polisi y’u Rwanda irashimira abaturage batanze amakuru ibiyobyabwe ndetse n’ibindi bicuruzwa bitemewe bigafatwa bitarakwirakwira mu baturage ngo bibagireho ingaruka, ikaboneraho kwibutsa abaturage gukomeza gutanga amakuru ku bantu bazwi ko bacuruza ibintu bitemewe.

Polisi kandi irihanangiriza abaturage bishora mu bikorwa byo gucuruza ibiyobyabwenge n’ibindi bicuruzwa bitemewe kubireka bagashaka ibindi bakora byabagirira akamaro ndetse ikanabibutsa ko ari icyaha gihanwa n’amategeko y’u Rwanda harimo n’igifungo cy’igihe kirekire.