Ku wa 21 no ku wa 22 Mata 2026, abasirikare n’abapolisi ba Repubulika Iharanira Demokarasi ya Congo bakorera muri Komini ya Makala i Kinshasa barasanye bikomeye.

Uku guhangana kwatangiye ubwo abasirikare bakorera mu gace ka Mabulu bajyaga kwitambika abapolisi bo mu mutwe ushinzwe ubutabazi bwihuse bataga muri yombi urubyiruko rukekwaho ubujura.

Abaturage bo muri Makala bavuga ko ubwo impande zombi zarasanaga, uru rubyiruko bivugwa ko ruba mu mutwe w’amabandi wa Kuluna rwatangiye gufasha abasirikare guhangana n’abapolisi.

Ikinyamakuru Actualité cyatangaje ko imirwano yahereye ku muhanda wa Elengesa hafi y’ikigo cya gisirikare, ari na ho uru rubyiruko rwafatiwe, igera hafi y’ikigo cya Polisi ku muhanda wa Kibambi 1.

Muri uko guhangana, inzu zegereye ahabereye imirwano zasahuwe, sitasiyo ya Polisi iri ku muhanda wa Kimfumu isenywa burundu. Abiga mu ishuri riri hafi yaho bahiye ubwoba, bose baryama hasi mu gihe urusaku rw’amasasu rwari rukiri rwinshi.

Tariki ya 22 Mata, Meya wa Makala, Ngudia Kabongo, yatangaje ko nta muntu wapfiriye muri iyi mirwano, icyakoze ko hari byinshi byangiritse birimo sitasiyo nto ya Polisi.

Mu rwego rwo gukumira imirwano, ku mugoroba wo ku wa 22 Mata muri Makala hoherejwe itsinda ry’abasirikare n’abapolisi kugira ngo bakore uburinzi buhuriweho.