Ubuyobozi bwa Arikidiyosezi Gatolika ya Kinshasa muri Repubulika Iharanira Demokarasi ya Congo, bwahakanye gucuruza ukarisitiya mu masoko yo mu murwa mukuru w’iki gihugu.

Ku mbuga nkoranyambaga hakwirakwiye amashusho bivugwa ko yafatiwe i Kinshasa, agaragaza ibimeze nka ukarisitiya bicuruzwa mu maguriro manini (supermarchés).

Abanye-Congo bakoresha izi mbuga na bamwe mu bayoboke ba Kiliziya Gatolika bacitse ururondogoro, bibaza uburyo “Umubiri wa Kirisitu” wagenewe abakirisitu ugurishwa mu masoko nk’amandazi.

Umushumba w’umusigire wa Arikidiyosezi ya Kinshasa, Musenyeri Charles Ndaka Salabisala, yatangaje ko nyuma y’ubusesenguzi bwakozwe, byagaragaye ko aya mashusho atafatiwe mu murwa mukuru.

Musenyeri Salabisala yagize ati “Nyuma y’isuzuma, bigaragara ko amashusho yakwirakwiye adaturuka mu Mujyi wa Kinshasa.”

Kiliziya Gatolika yashinje amatorero y’inzaduka kwigana ukarisitiya zayo, agakoresha ibimeze nka zo mu nsengero zayo. Ihamya ko mu masoko yo mu karere ka Limete hagaragara ukarisitiya z’inyiganano, zigurishwa abantu basanzwe.

Mu gihe hakwirakwira aya makuru, Musenyeri Salabisala yasabye abakirisitu gatolika kwirinda ababayobya, isaba abacuruzi n’abaguzi kubahiriza indangagaciro za Kiliziya Gatolika.