Ihuriro AFC/M23 rirwanya ubutegetsi bwa Repubulika Iharanira Demokarasi ya Congo ryatangaje ko ingabo z’iki gihugu, iz’u Burundi n’indi mitwe bikorana irimo abacancuro na FDLR byagabye ibindi bitero bikomeye ku basivili batuye mu ntara ya Kivu y’Amajyepfo.

Umuvugizi wa AFC/M23, Lawrence Kanyuka, kuri uyu wa 28 Kanama 2025 yasobanuye ko ibi bitero bya drones za CH-4 n’intwaro ziremereye byagabwe mu gace ka Mikenke mu misozi ya Minembwe ituyemo Abanyamulenge no mu bice bigize teritwari ya Kalehe.

Ati “Kuva mu ijoro ryo ku wa Gatatu tariki ya 27 Kanama 2025, ihuriro ry’ingabo za Leta ya Kinshasa (FARDC, FDLR, Mai Mai Wazalendo, abacancuro, Imbonerakure n’ingabo z’u Burundi, riri kurasa nta kuvangura ibice bituwe cyane muri Minembwe (Mikenke) na Kalehe (Katana, Kavumu, Katasomwa, Nyabibwe) no mu bice bihana imbibi, rikoresheje drones za CH-4 zigaba ibitero n’intwaro ziremereye. Ibitero birakomeje.”

Umutwe wa MRDP-Twirwaneho watangaje ko ibitero bya drones ziri gukoreshwa n’abacancuro byatangiriye mu gace ka Rugezi gaherereye mu majyepfo ya Minembwe, saa saba z’urukerera, byangiza itumanaho rya telefoni.

Wasobanuye ko ibindi bitero byagabwe mu mudugudu wa Kahololo mu misozi ya Itombwe muri teritwari ya Fizi no muri Uvira. Iti “Amakuru yizewe yemeza ko ibwiriza ryo gutera imidugudu yose ituwe n’Abanyamulenge mu gice cya Minembwe ryatanzwe na Kinshasa.”

Ibi bitero bikurikiye ibindi ihuriro ry’ingabo za Leta ya RDC ryagabye muri Kadasomwa tariki ya 26 n’iya 27 Kanama, n’ibyo ryagabye muri Minembwe tariki ya 27 Kanama. AFC yasobanuye ko hapfuye abasivili benshi, hakomereka benshi.

Ihuriro AFC ryatangaje ko ibi bitero bigaragaza ko Perezida Félix Tshisekedi n’abakorana na we bahisemo intambara, aho gukurikira inzira y’amahoro yaharuwe na Leta ya Qatar. Ryashimangiye ko rizakomeza kurinda no kurwanirira abasivili.