Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe, yatangaje ko nta bihano bishobora kubuza u Rwanda kurinda imipaka yarwo mu gihe mu burasirazuba bwa Repubulika Iharanira Demokarasi ya Congo hari umutwe w’iterabwoba wa FDLR ufite umugambi wo kuruhunganya.

Mu kiganiro Minisitiri Nduhungirehe yagiranye n’umunyamakuru David Baché uhagarariye Radiyo Mpuzamahanga y’Abafaransa (RFI) i Addis Abeba muri Ethiopia, kuri uyu wa 12 Gashyantare 2026, yasobanuye ko ikibazo u Rwanda rufite kuri Leta ya RDC ari uko ikomeje gufasha FDLR.

Yagize ati "Mu burasirazuba bwa RDC hari ikibazo cya FDLR, abajenosideri bakoze Jenoside mu Rwanda mu 1994, basigasiwe, bafashwa na Leta ya RDC, binjizwa mu gisirikare cya RDC. Ni yo mpamvu hasinywe amasezerano y’amahoro ya Washington. Leta ya RDC yemeye ko izasenya FDLR, u Rwanda rugakuraho ingamba z’ubwirinzi."

Minisitiri Nduhungirehe yakomeje ati “Bityo rero FDLR ni ikibazo cy’ingenzi kiri mu izingiro ry’aya makimbirane, kigomba gukemurwa no kuyisenya nk’uko amasezerano y’amahoro ya Washington abiteganya.”

Umuvugizi wa Guverinoma ya RDC, Patrick Muyaya, tariki ya 11 Gashyantare yatangarije iyi radiyo ko u Rwanda ruba rushaka ko intambara yo mu gihugu cyabo ikomeza kubera ko ngo rushaka inyungu z’amabuye y’agaciro y’Abanye-Congo.

Minisitiri Nduhungirehe yasubije ko ibyatangajwe na Muyaya ari ibinyoma, kandi ko abikora abigambiriye, mu gihe Leta ya RDC ikomeje gufasha FDLR, nyamara yakabaye iyisenya nk’uko yabyemereye i Washington muri Amerika kuva muri Kamena 2025.

Umunyamakuru yabwiye Minisitiri Nduhungirehe ko hari abari gusabira u Rwanda ibihano kandi ko Leta Zunze Ubumwe za Amerika zishobora gufata icyo cyemezo vuba cyane, amubaza niba adatewe ubwoba n’ibyo bihano.

Yamusubije ati "Iyaba ibihano byakemura ibibazo bitarangira byo muri RDC, nasinya ejo mu gitondo. Urabizi ko mu 2012/2013, na bwo u Rwanda rwafatiwe ibihano? Ese ibyo byakemuye ikibazo cya RDC, M23? Oya. Intambara yubuye nyuma y’imyaka umunani, mu Ukwakira 2021.”

Minisitiri Nduhungirehe yatangaje ko aho ibihano byaturuka hose, bidateze kubuza u Rwanda kurinda imipaka yarwo n’abaturage barwo, kuko rudashobora kwemera ko FDLR isubiza Abanyarwanda mu bihe by’icuraburindi banyuzemo mu 1994.

Ati “Kuvuga iyi nkuru y’ibihano, nk’aho byakora ibitangaza, nta shingiro bifite. Nta bihano muri iyi Si nzima byatubuza kurinda imipaka yacu no gukora ibishoboka kugira ngo abaturage bacu batazongera gusubira mu byo batewe na FDLR mu 1994.”

Yagaragarije umunyamakuru ko mu Isi, buri wese agomba kwikorera umusaraba we, bityo ko Leta ya RDC igomba gukemura iby’abaturage bayo, ihereye mu mizi, aho gukomeza kubyegeka ku Rwanda.

Raporo y’impuguke z’Umuryango w’Abibumbye yasohotse mu mpera z’Ukuboza 2025, igaragaza ko nyuma yo kwemera gusenya FDLR, Leta ya RDC yaciye mu gikari, isezeranya uyu mutwe w’iterabwoba ko itazubahiriza iri sezerano, ishingiye ku kuba uyifasha kurwanya AFC/M23.

Leta ya RDC irakataje mu gusabira u Rwanda ibihano muri Amerika n’ahandi

Minisitiri Nduhungirehe yasabye Leta ya RDC kwikorera umusaraba wayo