Minisiteri y’Ingabo muri Latvia yatangaje ko hari kwigwa uburyo bitarenze mu 2028 abagore batangira gutegekwa kujya mu gisirikare hagamijwe kongera umubare w’ingabo zahangana n’u Burusiya mu gihe bwaba bushoje intambara ku Burayi.

Minisitiri w’Ingabo, Andris Spruds, yabwiye Delfi TV ko ishyaka rye mu 2026 riteganya gutanga icyifuzo ko abasore n’inkumi bategekwa kubanza kunyura mu ngabo z’igihugu, bikazatangira mu 2028.

Yahamije ko ibikoresho bigenewe abagore byatangiye gutegurwa mu byifashishwa mu ngabo z’igihugu bitegura impinduka ziri imbere.

Magingo aya abagabo bo muri Latvia bategekwa kunyura mu gisirikare. Bivugwa ko iki gihugu cyifuza kuba cyakubye kabiri umubare w’abasirikare gifite bakagera ku bihumbi 30 mu 2028, bavuye kuri 15 gifite ubu.

Mu gihe iri tegeko ryaba ritowe, iki gihugu cyaba cyiyongereye kuri Denmark yamaze kwemeza ko muri Werurwe 2026 abagore bazatangira kwinjizwa mu gisirikare.

Kuva mu 2022 u Burusiya bwubura intambara muri Ukraine, ibihugu by’i Burayi bihora byikanga ko intambara ishobora kubigeraho, bityo ingamba zabaye kongera umubare w’ingabo binongera 5% ku ngengo y’imari ikoreshwa n’ingabo za OTAN.

Abagore bo muri Latvia bagiye gutegekwa kujya mu gisirikare