Kuri uyu wa Kabiri, itariki 30 Nyakanga, Libya yasubije mu bihugu byabo abimukira 369, baturuka muri Nigeria no muri Mali barimo abagore barenga ijana n’abana .

Sponsored Ad

Umuyobozi w’ishami rishinzwe guhagarika abimukira badakurikije amategeko, muri minisiteri y’ubutegetsi bw’igihugu ya Libya, Mohammed Baredaa, yavuze ko indege ebyiri zatahanye Abanyanijeriya 204 n’Abanyamali 165.

Mohammed Bareeda yavuze ko impinja icyenda, abana 18 batarageza ku myaka y’ubukure, n’abagore 108, ari bamwe mu banyanijeriya bari bimukiye mu gihugu cya Libya mu buryo butemewe.

Uyu muyobozi yavuze ko izo ngendo zakozwe ku bufatanye n’Umuryango Mpuzamahanga ushinzwe Abimukira (OIM) nk’uko tubikesha Ibiro Ntaramakuru by’Abafaransa, AFP.

Umunyanijeriya, Hakim w’imyaka 59 umaze imyaka 25 aba muri Libya, wanze ko irindi zina rye ritangazwa, yavuze ko bamwambuye pasiporo ye mbere yo kumufunga we n’umugore we, mbere yo kubasubiza mu gihugu baje baturukamo.

Yagize ati: " Baje nijoro bica urugi."

Libiya yanenzwe kenshi gufata nabi abimukira n’impunzi, hari n’ibirego by’imiryango iharanira uburenganzira bwa muntu, kuva mu kwambura abantu kugeza mu kubakoresha ubucakara, aho ababurokotse benshi muri bo bamaze kwimurirwa mu Rwanda ku bufatanye bwa Guverinoma y’u Rwanda na UNHCR.