Umuyobozi wa Komisiyo y’Umuryango w’Abibumbye ishinzwe uburenganzira bw’ikiremwamuntu, Volker Türk, yagaragaje ko ubugizi bwa nabi abasirikare ba Repubulika Iharanira Demokarasi ya Congo n’abarwanyi b’imitwe yitwaje intwaro ya Wazalendo bakoreye abaturage bugize ibyaha by’intambara.

Türk yasobanuye ko ubwo AFC/M23 yafataga umujyi wa Goma mu mpera za Mutarama 2025, ingabo za RDC ndetse na Wazalendo byabuze ubiyobora, birica, bifata ku ngufu ndetse bisahura imitungo y’abaturage.

Yagaragaje ko intumwa z’iyi Komisiyo zagiye gukora iperereza ku iyubahirizwa ry’uburenganzira bw’ikiremwamuntu mu burasirazuba bwa RDC kuva muri Mutarama, zasanze Wazalendo yarashimuse abaturage igamije kubambura amafaranga, abandi ibafunga binyuranyije n’amategeko.

Ati “Izi ntumwa zakiriye amakuru y’imitwe ya Wazalendo yafunze abantu mu buryo bunyuranyije n’amategeko, ishimuta abantu igamije kubambura amafaranga, inatanga ibihano bya kiboko mu bice igenzura.”

Türk yagaragaje impungenge ku bantu bakomeje gufungwa n’ubutasi bw’igisirikare cya RDC binyuranyije n’amategeko, abandi bakaburirwa irengero bakekwaho gukora na AFC/M23, asobanura ko ibi bikorwa biri gukorwaho iperereza.

Ubutumwa bwa Türk ku bugizi bwa nabi bwakozwe n’abasirikare ba RDC ndetse na Wazalendo buca amarenga ko mu gihe iperereza rizaba ryarangiye, ababugizemo uruhare bashobora kuzakurikiranwa n’ubutabera mpuzamahanga.