Umutwe wa M23 watanze integuza y’uko ugomba gusubira mu mirwano n’Ihuriro ry’Ingabo za Leta ya Repubulika Iharanira Demokarasi ya Congo, mu rwego rwo kuburizamo ubitero zikomeje kugaba ku birindiro byawo.

Sponsored Ad

Kuva mu kwezi gushize M23 yafashe icyemezo cyo gusubiza inyuma ingabo zayo, ziva mu mujyi wa Walikale uriya mutwe waherukaga kwigarurira.

Ni icyemezo uyu mutwe wafashe mu rwego rwo guha amahirwe inzira y’ibiganiro by’ubuyobozi bwawo na Leta ya Repubulika Iharanira Demokarasi ya Congo, mu rwego rwo gukemura amakimbirane yateje intambara yongeye kubura mu myaka itatu ishize.

Impande zombi zimaze iminsi zihurira i Doha, mu biganiro zihurizwamo n’ubwami bwa Qatar.

M23 icyakora ivuga ko mu gihe yabaye ihagaritse imirwano, ihuriro ry’Ingabo za Leta rigizwe na FARDC, FDLR, Mai-Mai/Wazalendo n’Ingabo z’u Burundi zikomeje kwica agahenge ndetse no guhonyora uburenganzira bwa muntu.

Umuvugizi w’uyu mutwe, Lawrence Kanyuka, mu itangazo yasohoye, yamaganye kuba ingabo za Leta ya Kinshasa zarigaruriye Umujyi wa Walikale, “zinasahura umujyi wa Walikale nyuma y’uko twari tumaze kuwuvanamo ingabo zacu”.

M23 kandi yemeje ko ingabo za Leta zimaze iminsi zigaba ibitero byinshi mu duce dutuwe cyane n’abaturage ndetse no ku birindiro byayo biherereye muri za Teritwari za Masisi, Walikale na Walungu.

Ishinja kandi ingabo za Leta y’i Kinshasa kuba zikomeje kugaba ibitero byibasira abanye-Congo bo mu bwoko bw’Abanyamulenge.

Ni ibitero birimo icyo izo ngabo zagabye ahazwi nka Point-zero na Bilalombili ku wa 8 Mata, ibyagabwe abatuye ahitwa Rugezi hagati y’itariki ya 8 n’iya 10 Mata, ndetse n’ibyagabwe i Kavumu na Gahwera ku wa 10 Mata bigasiga imitungo myinshi y’abaturage yangijwe indi igasahurwa.

M23 yavuze ko igishyize imbere gukemura amakimbirane yo muri RDC mu mahoro, gusa igashimangira “umuhate wo kurinda no gukingira abasivile, ndetse no guhagarika ikitugeramiye tugisanze aho gituruka.”