Umutwe wa M23 kuri uyu wa Gatanu wemeye ko uzafasha ingabo z’Umuryango wa SADC ziri muri Repubulika Iharanira Demokarasi ya Congo gutaha, zikajyana n’ibikoresho byazo birimo n’intwaro.

Sponsored Ad

M23 yemeye gutanga ubwo bufasha, ubwo kuri uyu wa Gatanu yahuriraga mu nama n’Abagaba b’Ingabo z’ibihugu bigize SADC yabereye mu mujyi wa Goma.

Ni inama ku ruhande rw’uyu mutwe yitabiriwe n’Umugaba Mukuru w’Ingabo zawo, Général-Major Sultani Makenga wari kumwe na Général de Brigade Bérnard Maheshe Byamungu umwungirije cyo kimwe na Bahati Musanga Erasto usanzwe ari Guverineri w’Intara ya Kivu y’Amajyaruguru.

Abandi bayitabiriye barimo Umugaba Mukuru w’Ingabo za Afurika y’Epfo, Maj Gen Rudzani Maphwanya, uw’iza Zambia, Lt Gen Geoffrey C. Zyeere, Maj. Gen Saiford Kalisha wari uhagarariye Umugaba Mukuru w’Ingabo za Malawi, Maj. Gen Ibrahim Michael Mhona wari uhagarariye Umugaba Mukuru w’Ingabo za Tanzania na Prof. Kula Teletsane usanzwe ari Umuyobozi Mukuru ushinzwe Politiki, Igisirikare n’umutekano muri SADC.

Ibihugu bya Afurika y’Epfo, Malawi na Tanzania bisanzwe bifite muri Congo ingabo byoherejeyo mu butumwa bwa SADC buzwi nka SAMIDRC bwari bugamije gufasha ingabo za kiriya gihugu guhangana na M23.

Uyu mutwe icyakora kuva wafata umujyi wa Goma ingabo za SADC zari ziwurimo zisanze zawugotewemo; zibura uko zawusohokamo. Ni ibyatumye abakuru b’ibihugu bigize uriya muryango w’ibihugu byo mu majyepfo ya Afurika bafata icyemezo cyo gucyura ziriya ngabo; nyuma yo kubura uko zava i Goma ngo zikomeze urugamba.

Itangazo rihuriweho ryashyizeho umukono na Gen. Makenga ndetse na mugenzi we Mhona nyuma y’inama yo kuri uyu wa Gatanu, rivuga ko impande zombi zagaragaje “umuhate w’impande zombi ku guhagarika imirwano, agahenge ndetse no gucyura nta mananiza ingabo za SAMIDRC.”

Iryo tangazo kandi rivuga ko zemeranyije ko M23/AFC igomba “gufasha by’ako kanya icyura ry’ingabo za SAMIDRC [zigatagana] n’intwaro zazo ndetse n’ibikoresho, ariko zigasiga intwaro zose za FARDC n’ibikoresho byayo zifite.”

Mu byo M23 na SADC bemeranyije kandi harimo kuba uriya mutwe ugomba kwemerera ingabo z’uriya muryango ziri muri Congo gukora ingendo, mu rwego rwo kwitegura gutaha ariko hagendewe ku mahame yemeranyijweho.

Biteganyijwe ko ingabo za SADC zizifashisha ikibuga cy’indege cya Goma zisubira iwabo.

Icyakora bitewe n’uko iki kibuga cyangirijwe n’imirwano yasakiranyije M23 n’ihuriro ry’ingabo za Leta ya RDC yabaye muri Mutarama uyu mwaka, SADC yemeye ko igomba kubanza kugisana mbere yo kubanza kugikoresha.