Guverinoma ya Maroc yasuzumye amasezerano icyo gihugu giherutse kugirana n’u Rwanda yo gufatanya mu by’ubwikorezi bwo mu kirere mbere y’uko yemezwa burundu.

Ni amasezerano yashyizweho umukono ku wa 25 Nzeri 2025 ubwo impande zombi zitabiraga Inama Mpuzamahanga y’Umuryango ushinzwe Indege za gisivili, ICAO, iheruka kubera i Montreal muri Canada.

U Rwanda rwari ruhagarariwe na Ambasaderi w’u Rwanda muri Canada, Higiro Prosper, mu gihe Maroc yari ihagarariwe na Minisitiri w’Ubwikorezi, Abdessamad Kayouh ari na bo bashyize umukono kuri ayo masezerano.

Ikinyamakuru Morocco World News cyatangaje ko Inama y’Abaminisitiri ba Guverinoma ya Maroc yateranye ku wa 29 Mutarama 2026 yasuzumye ayo masezerano y’ubwikorezi bwo mu kirere Maroc yasinyanye n’u Rwanda.

Kuyasuzuma ni icyiciro mu buryo bw’ubuyobozi kibanziriza kuyemeza burundu noneho hakazakurikiraho kuyashyira mu bikorwa.

Minisitiri w’Ubwikorezi n’Ibikorwaremezo wa Maroc, Abdessamad Kayouh muri iyo nama yamurikiye bagenzi be umushinga w’itegeko No 67.25 rigamije kwemeza ayo masezerano urasuzumwa.

Ubwo ayo masezerano yasinywaga, abayobozi ku mpande zombi bavuze ko agamije gushimangira ubufatanye bw’ibihugu byombi mu by’indege za gisivile.

Minisitiri Abdessamad Kayouh yavuze ko intego za Minisiteri ayoboye ari ugukuba kabiri umubare w’abagenzi sosiyete yabo itwara, bakava kuri miliyoni 40 bakagera kuri miliyoni 80 bitarenze mu 2030.

Ambasaderi Higiro Prosper yavuze ko ayo masezerano ari intambwe nziza, ndetse ashimangira ko ubufatanye hagati y’impande zombi mu bijyanye n’ubwikorezi bwo mu kirere ari intambwe ikomeye.

Ati “Ni intambwe ifungurira amahirwe mashya y’imikoranire mu by’indege za gisivili.”

Yavuze ko bizafasha u Rwanda kwagura sosiyete yayo ya RwandAir no kwihutisha iyubakwa ry’Ikibuga Mpuzamahanga cya Kigali kiri kubakwa mu Karere ka Bugesera gifite ubushobozi bwo kuzajya cyakira abagenzi barenga miliyoni 14 buri mwaka.

Kugeza ubu, RwandAir igana mu byerekezo bibarirwa muri 30 harimo ibyo mu bihugu 22 muri Afurika, u Burayi, mu Burasirazuba bwo Hagati ndetse na Aziya.