Ikigo Meta gifite urubuga nkoranyambaga rwa Facebook, WhatsApp na Instagram kiri mu biganiro n’ibigo byo muri Leta Zunze Ubumwe za Amerika bitanga inguzanyo kugira ngo bikigurize miliyari 29 z’Amadolari zo gushora mu mushinga w’ubwenge buhangano (AI).

Iki kigo kiyoborwa n’umuherwe Mark Zuckerberg gishaka kubaka ububiko bw’amakuru ya AI, ibyagifasha guhatana n’ibindi bigo bikataje muri iri koranabuhanga nka OpenAI na X AI.

Ibigo bitanga inguzanyo biri kuganira na Meta birimo Apollo Global Management, KKR, Brookfield, Carlyle ndetse na Pimco, nk’uko ikinyamakuru Financial Times cyabitangaje kuri uyu wa 28 Kamena 2025.

Mu gihe ibiganiro bikomeje, muri Meta hakomeje ibiganiro mpaka bigamije kureba uburyo yazahabwamo iyi nguzanyo n’uburyo amafaranga yinjiza yakwiyongera kugira itazagorwa no kuyishyura.

Muri iki cyumweru, abashakashatsi batatu ba OpenAI batangaje ko bagiye gutangira gukorera Meta AI. Bivugwa ko Zuckerberg yabasezeranyije umushahara utubutse kugira ngo bemere kwinjira mu mushinga we.

Muri uku kwezi, Meta yatangaje ko igiye ingufu ziva mu ruganda rwa nucléaire ruri muri Leta ya Illinois mu gihe cy’imyaka 20 kugira ngo zijye zifashishwa mu mushinga wa AI.