Ikigo cy’Igihugu cy’Iteganyagihe, Meteo Rwanda, cyatangaje ko mu minsi icumi ya mbere y’ukwezi k’Ugushyingo 2025, mu Gihugu hateganyijwe imvura iri hagati ya milimetero 20 na 70, ikaba iri hasi gato y’ikigero cy’impuzandengo y’isanzwe igwa muri iki gice yari ku mpuzandengo iri hagati ya milimetero 20 na 100.

Umubare w’iminsi imvura izagwamo uri hagati y’iminsi ibiri n’ine bitewe n’imiterere ya buri hantu.

Ni ibikubiye mu nyandiko y’iteganyagihe ry’igice cya mbere cy’Ugushyingo, kuva taliki ya 1 kugeza ku ya 10, iki kigo cyasohoye.

Meteo Rwanda yagaragaje ko imvura iri hagati ya milimetero 20 na 70 ari yo iteganyijwe mu Gihugu muri rusange, ikaba iri munsi gato y’impuzandengo y’isanzwe igwa muri iki gice cya mbere cy’Ugushyingo.

Iti: “Imvura iri hagati ya milimetero 50 na 70 iteganyijwe mu burengerazuba bw’Uturere twa Nyagatare, Muhanga, Ruhango na Nyaruguru, Akarere ka Burera uretse mu bice bito by’amajyepfo yako, amajyaruguru n’uburengerazuba bw’Uturere twa Gakenke na Nyamagabe, Akarere ka Musanze ndetse no mu Ntara y’Iburengerazuba uretse mu kibaya cya Bugarama n’uburasirazuba bw’Akarere ka Ngororero.”

Iki kigo gishinzwe iteganyagihe cyakomeje kigaragaza ko imvura iri hagati ya milimetero 40 na 50 iteganyijwe mu kibaya cya Bugarama, ahasigaye mu Karere ka Ngororero, mu Ntara y’Amajyaruguru n’iy’Amajyepfo uretse mu bice by’Amayaga, mu Mujyi wa Kigali, uburengerazuba bw’Uturere twa Rwamagana na Gatsibo ndetse n’ibice by’amajyaruguru n’ibyo hagati by’Akarere ka Nyagatare.

Meteo Rwanda iti: “Imvura iri hagati ya milimetero 30 na 40 iteganyijwe mu bice by’Amayaga, mu Karere ka Bugesera, ahasigaye mu Turere twa Nyagatare na Rwamagana, ahasigaye mu Karere ka Gatsibo uretse ibice bito by’uburasirazuba bwako, Akarere ka Ngoma uretse ibice bito by’amajyaruguru yako ndetse n’uburengerazuba bw’Uturere twa Kayonza na Kirehe. Ahasigaye mu Gihugu hateganyijwe imvura iri hagati ya milimetero 20 na 30.”

Meteo Rwanda yavuze ko kandi ubushyuhe bwo hejuru buteganyijwe buzaba buri hagati ya dogere Selisiyusi 18 na 30. Naho ubushyuhe bwo hasi buteganyijwe buzaba buri hagati ya dogere Selisiyusi 7 na 17.

Umuyaga uringaniye ushyira kuba mwinshi ufite umuvuduko uri hagati ya metero 4 na 12 ku isegonda, uteganyijwe kuzakomeza mu bice bitandukanye by’Igihugu.

Yavuze ko nubwo hateganyijwe ko imvura izagabanuka, binateganyijwe ko aho izajya igwa izaba irimo inkuba ndetse n’umuyaga mwinshi, bityo ko abaturarwanda bagiriwe inama yo gufata ingamba zijyanye no kwirinda ingaruka zituruka ku kirere ziteganyijwe, bakurikiza amabwiriza bahabwa n’inzego zifite gukumira ibiza mu nshingano.