Minisitiri w’Intebe Dr Nsengiyumva Justin yitabiriye ibirori byo gutangiza ku mugaragaro Inama Ngarukamwaka ya Banki Nyafurika Itsura Amajyambere (AfDB) iri kubera i Brazzaville.

Iyi nama yatangiye ku wa 26 Gicurasi 2026, ikaba yitabiriwe n’abakuru b’ibihugu barimo Perezida Denis Sassou Nguesso wa Repubulika ya Congo, Brice Oligui Nguema wa Gabon na Faustin-Archange Touadéra wa Centrafrique, hamwe n’abakuru ba za guverinoma barimo Minisitiri w’Intebe w’u Rwanda, ndetse n’abayobozi b’ibigo by’abikorera, amabanki n’abandi bafatanyabikorwa batandukanye.

Ibiro bya Minisitiri w’Intebe byatangaje ko “Minisitiri w’Intebe Nsengiyumva yifatanyije n’abakuru b’ibihugu na za guverinoma mu birori byo gutangiza ku mugaragaro Inama Ngarukamwaka ya Banki Nyafurika Itsura Amajyambere ya 2026.”

Perezida wa AfDB, Dr Sidi Ould Tah, yagaragaje ko hakenewe ivugurura mu mikorere, amategeko n’ibikorwaremezo byorohereza kubona imari, hagamijwe guteza imbere umugabane wa Afurika.

Banki Nyafurika Itsura Amajyambere (AfDB) yatangiye gukorera mu Rwanda mu 1974, ikaba ari umwe mu bafatanyabikorwa bakomeye u Rwanda rufite, aho igice kinini cy’inkunga yayo gishyirwa mu bikorwa remezo.