Irasubiza Alliance, wamenyekanye cyane ubwo yegukanaga ikamba rya Miss Popularity mu irushanwa rya Miss Rwanda 2020, yakoze ubukwe mu birori byabereye muri Leta Zunze Ubumwe za Amerika.

Sponsored Ad

Mu kwezi kwa Kamena 2024, ni bwo uyu mukobwa yerekanye bwa mbere umusore bakundana ku mbuga nkoranyambaga, ashimangira urukundo rwabo mu butumwa bwuje ibyishimo. Nyuma y’amezi make, muri Kanama, Irasubiza yambitswe impeta y’ubukwe n’uyu musore, bemeranya kuzabana akaramata.

Mbere y’ubu bukwe, ku wa 14 Ukuboza 2024, Irasubiza yari yasoje amasomo ya Master’s Degree muri Kaminuza ya Boise State University, ashimangira ko yateye imbere mu bijyanye n’uburezi. Iki cyemezo cyihariye kije cyunganira indi ntambwe idasanzwe y’ubuzima bwe, ubwo yahatanaga mu irushanwa rya Miss Rwanda 2020, akegukana ikamba ry’umukobwa ukunzwe cyane mu gihugu, Miss Popularity.

Ubukwe bwa Irasubiza bwitabiriwe n’inshuti ze za hafi, umuryango we, n’abandi batumirwa baturutse mu bice bitandukanye. Ni ibirori byaranzwe n’umutuzo, umuco, n’urukundo, aho Irasubiza yasangije abamukurikira kuri Instagram amafoto n’amashusho agaragaza ibyishimo yagize kuri uwo munsi udasanzwe.

Irasubiza Alliance ni urugero rwiza rw’umukobwa w’Umunyarwandakazi uhuza ubushake bwo kugera ku ntego no guharanira iterambere.

Uhereye ku gihe yigaragaje muri Miss Rwanda 2020 kugeza ku ntsinzi yo kurangiza icyiciro cya Master’s Degree, ni urugero ku rubyiruko rwifuza kuzamura impano n’ubumenyi mu muryango mugari w’isi.

Biteganyijwe ko ibindi birori by’ubukwe birabera mu Mujyi wa Nampa, muri Leta ya Idaho, ku wa 19 Ukuboza 2024.