MONUSCO yatangije, kuri uyu wa Mbere, itariki ya 4 Ugushyingo i Goma muri Kivu y’Amajyaruguru, amahugurwa ya ba ofisiye mirongo ine bo mu Ngabo za SADC muri Repubulika ya Demokarasi ya Congo (SAMIDRC), nk’abazigisha abandi. Muri icyo gihe, ubutumwa bwa Loni bwahaye izo ngabo imodoka y’umutamenwa hamwe na kontineri zigera kuri mirongo itatu.

Sponsored Ad

Uyu muhango ugaragaza itangizwa ry’ishyirwa mu bikorwa ry’umwanzuro w’2746 w’Akanama k’Umuryango w’Abibumbye gashinzwe Umutekano werekeranye n’inkunga MONUSCO igomba gutanga kugira ngo Ingabo za SADC zirusheho gukora neza mu burasirazuba bwa DRC.

Kuri uyu munsi, Vivian van de Perre, Intumwa Idasanzwe Yungirije y’Umunyamabanga Mukuru w’Umuryango w’Abibumbye muri DRC ushinzwe kurinda n’ibikorwa, yatangaje ko yishimiye kuba yongeye kuza ku cyicaro gikuru cya SAMIDRC i Goma nk’uko tubikesha Radio Okapi.

Ati: "Uyu munsi, naje gutanga, ndi kumwe n’umuyobozi wungirije w’ingabo za SAMIDRC, impano y’ibikoresho ya kontineri mirongo itatu n’imodoka y’umutamenwa byaturutse muri MONUSCO, hakurikijwe icyemezo cy’Akanama gashinzwe Umutekano. Aka kasabye MONUSCO gushyigikira SAMIDRC mu buryo bushoboka....."

Ku bwe, uru ruhererekane rw’amahugurwa ku basirikare ba SAMIDRC ruvzibanda cyane cyane ku bibazo bya:

Uburenganzira bwa muntu
Amategeko mpuzamahanga arengera ikiremwamuntu
Kurengera abana
Kurengera abaturage
Imyitwarire na disipulini.

Vivian van de Perre yijeje ko: "MONUSCO izakomeza gushyigikira SAMIDRC, kubera ko twese duharanira amahoro mu burasirazuba bwa Repubulika ya Demokarasi ya Congo."

Umuyobozi wungirije w’ingabo za SADC muri DRC yagaragaje ko yishimiye iyi nkunga yatanzwe na MONUSCO, nk’uko abitangaza ngo izateza imbere imirimo ya SAMIDRC kuri ’terrain’.