Kuri uyu wa Gatatu abashinzwe umutekano b’u Rwanda bo muri (Task Force Battle Group 3) ikorera mu karere ka Ancuabe, intara ya Cabo Delgado, muri Mozambike bamuritse ibyumba bitanu byavuguruwe ku ishuri ribanza rya Nacololo.
Batanze kandi ibikoresho bitandukanye by’ishuri birimo ameza 100 y’abanyeshuri, ibitabo by’imyitozo, amakaramu, ingwa, na crayons ku banyeshuri barenga 500.
Brig Gen Théodomille BAHIZI, Umuyobozi wa Task Force Battle Group 3, yerekanye ko iyi mpano igamije kwerekana ko (...)

Sponsored Ad

Kuri uyu wa Gatatu abashinzwe umutekano b’u Rwanda bo muri (Task Force Battle Group 3) ikorera mu karere ka Ancuabe, intara ya Cabo Delgado, muri Mozambike bamuritse ibyumba bitanu byavuguruwe ku ishuri ribanza rya Nacololo.

Batanze kandi ibikoresho bitandukanye by’ishuri birimo ameza 100 y’abanyeshuri, ibitabo by’imyitozo, amakaramu, ingwa, na crayons ku banyeshuri barenga 500.

Brig Gen Théodomille BAHIZI, Umuyobozi wa Task Force Battle Group 3, yerekanye ko iyi mpano igamije kwerekana ko bashimira ubucuti n’ubufatanye buriho hagati y’u Rwanda n’ingabo za Mozambike.

Ati: "Twaje hano nk’Ingabo z’u Rwanda kugira ngo dushyire ingufu hamwe n’Ingabo za Mozambike (FADM), kugira ngo tugarure amahoro n’umutekano muri Cabo Delgado, tuzi ko uburezi ari umusingi w’iterambere iryo ari ryo ryose. Ingabo z’u Rwanda ziyemeje gukomeza gukorana na bagenzi bacu bo muri Mozambike kugira ngo ubutumwa twahawe buzarangire nk’uko bisabwa. ”

Benito Joaquim Santos Casimilo, Umuyobozi w’Akarere ka Ancuabe yashimye Ingabo z’u Rwanda ku bikoresho by’ishuri byahawe ishuri ndetse n’abana muri rusange anizeza ubufasha bwe igihe cyose bizaba ngombwa.

Umuyobozi w’ishuri, Faluki Silverio yashimangiye uruhare rukomeye rw’ibikoresho byatanzwe mu kuzamura ireme ry’uburezi ku banyeshuri.

Ati: “Abanyeshuri barenga 500, bicaraga hasi nta meza kandi badafite ibitabo by’imyitozo bihagije. Ibikoresho byatanzwe bizorohereza ishuri n’abanyeshuri kuzamura ireme ry’uburezi ”.

Ibi byabaye nyuma y’uko kuwa Mbere, itariki ya 02 Nzeri, Guverineri wa Cabo Delgado, Valige Tauabo, naho yafunguye ku mugaragaro ibyumba bine by’Ishuri Ribanza rya Namalala mu karere ka Mocimboa da Praia byubatswe n"Ingabo z’u Rwanda.