Perezida wa Uganda, yagaragarije urubyiruko uburyo yaciye mu rihumye inshuti ze na bagenzi be bari bariyeguriye inkumi we akiteza imbere mu buryo bufatika.

Kuri iki Cyumweru, tariki ya 1 Werurwe 2026, ni bwo Perezida Museveni yahuye n’urubyiruko rutandukanye rwo muri Uganda mu gikorwa cyiswe ‘Jazz with Jajja Ranch’ cyabaye ku nshuro ya kabiri.

Nk’uko bisanzwe muri iki gikorwa, Perezida Museveni aganiriza urubyiruko akarugira inama ku buryo bwo kwiteza imbere, kwihangira imirimo no gukunda igihugu, ashingiye ku myitwarire ye akiri muto.

Bimwe mu byo yarusabye harimo gukora cyane rudataye umwanya mu bitagira umumaro, yerekana uburyo bagenzi be bari barijanditse mu byo kubyinana n’inkumi we akishakira ubutunzi.

Ati “Umushahara wanjye wa mbere nahembwe nka mwarimu nawuguze ubutaka i Rwakitura. Nasize bagenzi banjye mu byo kubyinana n’inshuti nubaka ubukungu bwanjye.”

Rwakitura iherereye mu Burengerazuba bwa Uganda, mu Karere ka Kiruhuura hafi y’Umujyi wa Mbarara.

Jazz with Jajja ni ibiganiro bisanzwe bihuza Perezida Museveni n’abo mu ngeri zitandukanye barimo urubyiruko, abakoresha imbuga nkoranyambaga n’abandi.

Baba baganira ku bibazo bitandukanye birimo iterambere ry’igihugu, ubukungu n’uruhare rw’urubyiruko mu iterambere ry’igihugu.

Ni ibiganiro bikunze kuyoborwa n’umukobwa wa Perezida Museveni witwa Natasha Museveni Karugire, aho ibi biganiro bitambuka mu buryo bw’ako kanya ku mbuga nkoranyambaga kuri televiziyo no kuri radiyo zitandukanye.

Perezida Museveni yanagiriye urubyiruko inama, atanga urugero ku bakurikirana umupira w’amaguru cyane cyane uw’i Burayi, bakananirwa gukora no gutekereza ku iterambere ry’igihugu cyabo.

Ati “Ndi muto nari nzi gahunda zose za Leta. Ariko aho kugira ngo mwe mubihe agaciro, mwibereye muri Arsenal. Hari umuntu wambajije ngo ni iyihe kipe ufana? Nanjye ndamubaza nti ‘Ngo iki? Njyewe? Yoweri Museveni? General?’ Nta nshuro n’imwe ndareba umukino w’i Burayi.”