Ubutegetsi bwa Repubulika Iharanira Demokarasi ya Congo n’ihuriro AFC/M23 bishobora gusinya amasezerano y’amahoro bitarenze tariki ya 18 Kanama 2025, hashingiwe ku mahame byemeranyijeho muri Qatar.

Aya mahame yashyizweho umukono tariki ya 19 Nyakanga, arimo ingingo y’ubwumvikane ku guhagarika imirwano burundu, gucyura impunzi, kurekura imfungwa buri ruhande rufite no gusubiza ubutegetsi bwa Leta mu bice byose by’igihugu.

Leta ya RDC na AFC/M23 byemeranyije gushyira mu bikorwa aya mahame bitarenze iminsi 10 ashyizweho umukono no gutangira ibiganiro by’amahoro bitarenze iminsi 10 nyuma y’ishyirwa mu bikorwa ryayo.

Byateganyijwe ko amasezerano y’amahoro azasinywa nyuma y’iminsi iri hagati y’irindwi na 10 ibiganiro bishingiye kuri aya mahame bitangiye.

Hashingiwe kuri iyi gahunda, gushyira mu bikorwa aya mahame bishobora gutangira tariki ya 29 Nyakanga, bigakurikirwa n’ibiganiro by’amahoro byazatangira tariki ya 8 Kanama.

Iyi gahunda igaragaza ko hatagize igihinduka, Leta ya RDC na AFC/M23 byagirana amasezerano y’amahoro bitarenze tariki ya 18 Kanama 2025.