Umuraperikazi w’icyamamare ku rwego mpuzamahanga, Nicki Minaj, yatangaje ko agiye gutanga amafaranga ari hagati ya $150,000 [218,965,950.00 Frw] na $300,000 [437,931,900.00] azashyirwa muri konti z’imari zizwi nka ‘Trump Accounts’, hagamijwe gufasha abana b’abakunzi be kubaka ejo hazaza habo mu by’imari bakiri bato.

Nicki Minaj yabitangaje ubwo yitabiraga inama idasanzwe yabereye muri White House ku wa Gatatu, yahuriyemo na Perezida wa Leta Zunze Ubumwe za Amerika, Donald Trump, na Minisitiri w’Imari, Scott Bessent. Iyo nama yari igamije kwamamaza izi konti zifite imisoro igabanyijwe zigenewe abana, zigamije kubafasha gutangira kuzigamira hakiri kare.

Mu ijambo rye, Nicki Minaj yagize ati: “Iyo nza kubona amahirwe nk’aya nkiri muto, ubuzima bwanjye bwari kuba bwarahindutse cyane.” Ibi byashimangiye icyizere afite ko izi konti zishobora guhindura ejo hazaza h’abana benshi.

Kugeza ubu, ntiharamenyekana neza abazungukira mu nkunga Nicki Minaj agiye gutanga, ariko ikinyamakuru New York Post cyatangaje ko bishobora kugenerwa abakunzi be bazwi ku izina rya “Barbz.” White House n’abahagarariye Nicki Minaj ntibahise basubiza ku busabe bwo gutanga ibisobanuro birambuye kuri iyi nkunga.

Mu butumwa yashyize ku rubuga rwa X (Twitter) ku wa 24 Mutarama, Nicki Minaj yanditse ati: “Iyi ni yo ntego nyakuri yo gutanga ku bandi. Kwigisha abana iby’imari no kubaha inkunga hakiri kare bizabaha intangiriro nziza mu buzima.”

Abakoresha n’abagiraneza batandukanye batangiye gutanga inkunga

Guverinoma ya Leta Zunze Ubumwe za Amerika yatangaje ko abana bose bazavuka hagati ya 2025 na 2028 bazahabwa $1,000 ya mbere izashyirwa muri ‘Trump Account’ zabo na Minisiteri y’Imari, mu gihe ababyeyi bahisemo gufungura izi konti.

Byongeye, ibigo bikomeye by’ubucuruzi birimo JPMorgan Chase, Bank of America, Intel, Chime, SoFi, Charter Communications, BNY, BlackRock, Robinhood na Charles Schwab, byatangaje ko bizajya byongera $1,000 ku mafaranga ya Leta ku bana b’abakozi babo.

Hari kandi inkunga zidasubirwaho, zirimo $250 zizahabwa abana bafite imyaka iri munsi ya 10, zatanzwe na Michael Dell n’umugore we Susan, mu nkunga ya miliyari $6.25 bagenewe abana batemerewe ya $1,000 ya Leta.

Abana bo muri Leta ya Connecticut na bo bashobora kubona andi mafaranga aturuka kuri Ray Dalio, umuherwe uzwi mu micungire y’imari, afatanyije n’umugore we Barbara. Scott Bessent yatangaje ko hari n’abandi bagiraneza bashobora gutanga inkunga muri gahunda yiswe “50-State Challenge.”

Mu kiganiro Minisitiri w’Imari, Scott Bessent, yagiranye na CNBC ku wa Gatatu, yavuze ko imiryango irenga 600,000 yamaze kwiyandikisha muri izi ‘Trump Accounts’, kuva igihe umwaka w’ibarura ry’imisoro watangiriye ku wa Mbere.

Trump Accounts ni iki?

Trump Accounts ni konti z’imari zashyizweho na Leta Zunze Ubumwe za Amerika hagamijwe gufasha abana gutangira kubazigamira no kubaka umutungo bakiri bato. Izi konti zifite imisoro igabanyijwe (tax-advantaged accounts) ku buryo amafaranga ashyirwamo ashobora kwiyongera mu gihe kirekire atagabanyijwe cyane n’imisoro.

Buri mwana wemerewe iyi gahunda ahabwa inkunga ya mbere ya $1,000 itangwa na Minisiteri y’Imari ya Amerika, mu gihe ababyeyi bahisemo gufungura iyo konti. Aya mafaranga agenewe gufasha umwana mu bihe bizaza, nko mu myigire ye, mu kwihangira imirimo cyangwa mu zindi gahunda z’iterambere ry’ubukungu.

Leta yemera kandi ko abandi bantu barimo abakoresha, ibigo by’imari n’abagiraneza bashobora kongera amafaranga kuri izi konti, bigatuma abana bungukira ku nkunga nyinshi kurushaho.

Intego nyamukuru ya Trump Accounts ni gutoza abana n’imiryango yabo umuco wo kuzigama, kubaka ubumenyi mu by’imari no kugabanya icyuho cy’ubukungu mu gihe kizaza, binyuze mu gutangira kwitegura hakiri kare.

Kuki ziswe ‘Trump Accounts’?

Izi konti ziswe Trump Accounts kubera ko ari gahunda yashyizwe imbere kandi igashyigikirwa ku mugaragaro na Perezida Donald Trump n’ubutegetsi bwe. Ni imwe muri politiki z’ubukungu zigamije gusiga umurage urambye ku bana b’Abanyamerika, binyuze mu kubaha amahirwe yo gutangira kubaka ejo hazaza habo mu by’imari bakiri bato.

Nk’uko byagenze ku zindi gahunda nyinshi za Leta zunzwe amazina y’abazitangije cyangwa abazishyize imbere, Trump Accounts zitiriwe Trump mu rwego rwo kuyitandukanya n’izindi konti zisanzwe zo kuzigama, no kugaragaza ko ari politiki ye bwite ishingiye ku cyerekezo cye cy’iterambere ry’ubukungu.

Iryo zina kandi rifasha mu kumenyekanisha byihuse iyo gahunda mu ruhame, no kuyihuza n’ubuyobozi bwayishyizeho, ari na bwo bituma igira uburemere mu biganiro bya politiki n’ubukungu muri Amerika.

Mu nama ya Trump Accounts yabereye i Washington DC, Nicki Minaj yatangaje inkunga ya $150,000 kugeza kuri $300,000 igamije gushyigikira gahunda yo kuzigamira abana hakiri kare

Minisitiri w’Imari wa Leta Zunze Ubumwe za Amerika, Scott Bessent (ibumoso), n’umuhanzi Nicki Minaj (hagati), bakoma amashyi ubwo bitabiraga inama ya Trump Accounts

Ku wa 28 Mutarama 2026, umuhanzi Nicki Minaj (ibumoso) na Perezida wa Leta Zunze Ubumwe za Amerika, Donald Trump, bafatana mu ntoki ku rubyiniro, mu gihe cy’inama ya Trump Accounts yateguwe na Minisiteri y’Imari, yabereye muri Andrew W. Mellon Auditorium i Washington DC